दक्षिण महाराष्ट्रातून मुंबईकडे जाणाऱ्या भाजीपाल्यात घट 

कोल्हापूर : मुंबईची बाजारपेठ सुरू होऊन चार दिवसांहून अधिक काळ झाला असला तरी दक्षिण महाराष्ट्रातून अत्यल्प शेतमाल या बाजारपेठेत जात आहे. बाजारपेठेत व्यापाऱ्यांनी अनास्था दाखविल्याने विशेष करून कोल्हापूर जिल्ह्यातून अगदी नाममात्र शेतमाल मुंबईला जात असल्याने नुकसानीचे दुष्टचक्र कायम असल्याचे चित्र आहे. 

गेल्या सप्ताहात मुंबई बाजारपेठ बंद असल्याने शेतमाल वाहतूक थांबली होती. काही कालावधीनंतर बाजारपेठ सुरू झाली असली तरी ती अद्यापही सुरळीत झाली नाही. मुंबईत ‘कोरोना’चा प्रादुर्भाव वाढू लागल्याने बाजार समितीतील व्यापाऱ्यांनी शेतमाल खरेदीला अनुत्सूकता दाखविली आहे. यामुळे शेतमाल पाठवायचा कोणाकडे हा प्रश्‍न निर्माण झाला आहे. स्थानिक बाजारपेठेत उठाव नसल्याने भाजीपाला उत्पादकांची कोंडी कायम आहे. परिणामी भाजीपाल्याची काढणीही गतीने होत नसल्याची माहिती शेतकऱ्यांनी दिली. 

भाजीपाल्याच्या उत्पादनात अग्रेसर असणाऱ्या नांदणी (ता. शिरोळ) येथील शेतकरी सागर संभूशेटे यांनी सांगितले की, आमच्या गावातील भाजीपाला संघानी गेल्या चार दिवसांत एकही ट्रक भाजीपाला मुंबईला पाठविला नाही. व्यापाऱ्यांची खरेदीबाबत अनास्था, आणि व्यापाऱ्यांची अनुपलब्धता असल्याने आम्ही शेतमाल बाजारपेठेत पाठविला नाही. भाजीपाल्याची खरेदी झाली नाही तर होणारे नुकसान मोठे असल्याने आमच्या भागातून गाड्या मुंबई बाजारपेठेत गेल्या नाहीत. स्थानिक पातळीवर तातडीने पर्यायी व्यवस्था करण्याची गरज आहे.