पुणे : बंगालच्या उपसागरातील कमी दाब क्षेत्राची तीव्रता वाढल्याने ‘जवाद’ चक्रीवादळाची निर्मिती झाली आहे. आज (ता. ४) ही वादळी प्रणाली किनाऱ्याजवळ येण्याची शक्यता असून, तिची तीव्रता वाढण्याचे संकेत आहेत. किनाऱ्याजवळ येताच हे चक्रीवादळ ईशान्य दिशेकडे वळून, उद्या (ता. ५) ओडिशाच्या पूरीजवळ पोचण्याची शक्यता आहे. या चक्रीवादळाचा महाराष्ट्रात फारसा प्रभाव जाणवणार नाही.
थायलंडच्या किनाऱ्यालगत तयार झालेल्या चक्राकार वाऱ्यामुळे अंदमान समुद्रात कमी दाब क्षेत्र तयार झाले. त्याचे जवाद चक्रीवादळात रूपांतर झाले असून, ही प्रणालीचे केंद्र आंध्र प्रदेशातील विशाखापट्टणम पासून ४२० किलोमीटर, ओडिशाच्या गोपाळपासून ५३० किलोमीटर, तसेच पारदीपपासून ६५० किलोमीटर आग्नेयेकडे समुद्रात आहे.
भारताच्या किनाऱ्याकडे येताना त्याचे अतितीव्र चक्रीवादळात रूपांतर होण्याची शक्यता आहे. आज (ता. ४) हे चक्रीवादळ प्रणाली उत्तर आंध्र प्रदेश आणि दक्षिण ओडिशाच्या किनाऱ्याजवळ पोचणार आहे. पूर्व किनाऱ्यावर येताच वादळी प्रणालीची दिशा बदलून ते ईशान्येकडे पश्चिम बंगालकडे जाण्याचे संकेत आहेत.
उद्या (ता. ५) दुपारपर्यंत हे वादळ ओडिशाच्या पुरीजवळ पोहोचणार असून, त्यानंतर ते पश्चिम बंगालच्या किनाऱ्याकडे सरकण्याची शक्यता आहे. वादळाच्या प्रभावामुळे ओडिशा, आंध्रप्रदेश, पश्चिम बंगालमध्ये तशी ६० ते ९० किलोमीटर वेगाने वारे वाहणार असून, मुसळधारेचा इशारा देण्यात आला आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.