औरंगाबाद, जालना, परभणी, हिंगोली जिल्ह्यांत पीक कर्जवाटप केवळ सोळा टक्केच

औरंगाबाद  : मराठवाड्यातील शेतकऱ्यांवर नैसर्गिक संकट सुरू आहे. अशा वेळी पीक कर्जपुरवठा करण्यातही अक्षम्य हलगर्जीपणा होत असल्याचे चित्र आहे. चार जिल्ह्यांत पीककर्ज पुरवठा करणाऱ्या बॅंकांनी मिळालेल्या उद्दिष्टाच्या तुलनेत केवळ १६ टक्‍के कर्जपुरवठा केला आहे. अजूनही हजारो शेतकरी पीककर्ज मिळण्याच्या प्रतीक्षेत असून, त्यासाठी त्यांचे बॅँकांत हेलपाटे सुरू आहेत. 

कुठे पेरणीची संधीच मिळाली नाही, तर कुठे झालेली पेरणी पावसाअभावी अंगलट आली आहे. शेतकऱ्यांना खरीप व रब्बीत शेतीखर्चासाठी आधार मिळावा म्हणून शासनाने मराठवाड्यातील औरंगाबाद, जालना, परभणी व हिंगोली जिल्ह्यासाठी व्यापारी, ग्रामीण व जिल्हा मध्यवर्ती सहकारी बॅंकांना त्यांच्या परिस्थितीनुसार कर्जवाटपाचे उद्दिष्ट दिले. एकूण ४९११ कोटी ३३ लाख रुपयांच्या उद्दिष्टापैकी १५ जुलैपर्यंत चारही जिल्ह्यांत केवळ १६.१३ टक्‍के कर्जवाटप झाले. बॅंकांनी १ लाख ३३ हजार ५४७ सभासदांना केवळ ७९२ कोटी ४० लाख १७ हजारांचे कर्जवाटप केल्याचे समोर आले. 

या कर्जवाटपात २९.६७ टक्‍के कर्जवाटप करणाऱ्या जिल्हा मध्यवर्ती सहकारी बॅंका आघाडीवर आहेत. कमी कर्जवाटप करणाऱ्या व्यापारी बॅंकांनी केवळ १२.५१ टक्‍केच कर्जपुरवठा करण्याचे काम केले. ग्रामीण बॅंकेने व्यापारी बॅंकांपेक्षा थोडे जास्त १८.१६ टक्‍के उद्दिष्टपूर्ती केली. कर्जपुरवठा झालेल्या सभासदांमध्ये जिल्हा मध्यवर्ती बॅंकेच्या ८४७५९, व्यापारी बॅंकेच्या ३५१४१, तर ग्रामीण बॅंकेच्या १३६४७ सभासदांचा समावेश आहे. 

औरंगाबाद जिल्ह्यात उद्दिष्टाच्या २८.८९ टक्‍के, जालना जिल्ह्यात १९.७५ टक्‍के, परभणीत ९.६० टक्‍के, तर हिंगोली जिल्ह्यात केवळ ७.६३ टक्‍केच खरीप पीककर्ज पुरवठ्याची उद्दिष्टपूर्ती झाल्याचे सूत्रांनी सांगितले. पावसाने दिलेल्या ओढीसह त्याच्या असमान बरसण्याने शेतकरी संकटात सापडले आहेत. त्यांना आर्थिक हातभार मिळण्यासाठी ना बॅंका गंभीर दिसतात ना शासन. त्यामुळे शेतकरी अधिकच संकटात सापडल्याचे चित्र आहे. 

चार जिल्ह्यांतील कर्जपुरवठा स्थिती