नाशिक : सप्टेंबर महिन्याच्या सुरुवातीपासून राज्यात विविध ठिकाणी वादळी वाऱ्यासह झालेल्या अतिवृष्टीमुळे शेतकऱ्यांची तारांबळ उडाली आहे. नाशिक विभागात एकूण ५ जिल्ह्यामधील ३४ तालुक्यांमध्ये काढणीस आलेल्या खरीप पिकांसह, भाजीपाला व फळ पिकांचे ८३ हजार ६७५ हेक्टर क्षेत्रावर नुकसान झाल्याचा प्राथमिक अंदाज कृषी विभागाने व्यक्त केला आहे.
विभागात सर्वाधिक नुकसान नाशिक जिल्ह्यात झाले आहे. खरीप पिकांसह बागायती पिके व बहुवार्षिक फळे, पिकांना मोठ्या प्रमाणावर फटका बसल्याचे समोर आले आहे. यामध्ये भात, मका, ज्वारी, कापूस, तूर, सोयाबीन भुईमूग, उडीद, बाजरी, कांदा, कांदा रोपे, टोमॅटो, ऊस, केळी, भाजीपाला, डाळिंब, द्राक्ष या पिकांचे नुकसान झाले आहे.
यानंतर नुकसान नगर जिल्ह्यात ११ तालुक्यांमध्ये झाले आहे. यामध्ये मका, ज्वारी, कापूस, तूर, सोयाबीन, भुईमूग, उडीद, बाजरी, उडीद, मूग व भाजीपाला पिकांचे नुकसान झाले आहे. धुळे जिल्ह्यात ४ तालुक्यांत पिकांना फटका बसला आहे.
मका, ज्वारी, कापूस, तूर, सोयाबीन, भुईमूग, उडीद, बाजरी, मूग व भाजीपाला पिकांना फटका बसला आहे. नंदुरबार जिल्ह्यात मका, ज्वारी, कापूस, तूर, ऊस सोयाबीन, मिरची, उडीद, मूग व भात ही पिके तडाख्यात सापडली आहेत. जळगाव जिल्ह्यात मका, ज्वारी, कापूस, तूर, सोयाबीन, भुईमूग, उडीद, बाजरी, ऊस, केळी, पपई, लिंबू यासह इतर फळबागांना मोठ्या प्रमाणावर फटका बसला आहे.
शेतीकामे अडचणीत
कृषी विभागाने प्राथमिक नुकसानीचा अहवाल सादर केला असला, तरी अद्याप अनेक ठिकाणी शेतकरी पंचनाम्यांच्या प्रतीक्षेत आहेत. पावसामुळे अनेक ठिकाणी पाणी साचून आहे. शेतीपिकांचे नुकसान झाले आहे. त्यामध्ये बाजरी, मका, सोयाबीन, मूग, उडीद या पिकांसह भाजीपाला पिकांचा समावेश आहे. सोंगणी करणे अडचणीचे ठरत आहे. अनेक शेते उपळली आहेत. त्यामुळे हंगामातील काढणीचे नियोजन पुरते कोलमडले आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.