सांगलीत पूरबाधितांच्या कर्जमाफीसाठी बॅंकांकडे १२९ कोटी रुपये वर्ग 

सांगली ः जिल्ह्यात मागील वर्षी ऑगस्ट महिन्यात पूर आला होता. त्यामध्ये अनेक शेतकऱ्यांचे नुकसान झाले होते. या पूरग्रस्त शेतकऱ्यांच्या कर्जमाफीसाठी १३० कोटी ९१ लाख रुपयांचा निधी प्राप्त झाला होता. यातील १२९ कोटी ४४ लाख रुपयांची रक्कम विविध बॅंकांकडे पूर बाधित शेतकऱ्यांच्या पीक कर्जमाफीसाठी वर्ग करण्यात आली आहे. 

गतवर्षी जुलै-ऑगस्टमध्ये सांगली जिल्ह्यात झालेली अतिवृष्टी व महापूर यामुळे कृषी क्षेत्राचे मोठ्या प्रमाणावर नुकसान झाले होते. यातून दिलासा देण्यासाठी पूरबाधित शेतकऱ्यांसाठी एक हेक्‍टर पर्यंतची पीक कर्जमाफी जाहीर करण्यात आली होती. त्यानुसार जिल्ह्यातील पूर पट्ट्यातील शेतकऱ्यांची यादी तयार केली होती. ही यादीची पडताळणी करून संबंधित विभागाने विभागीय पातळीवर प्रस्ताव सादर केला होता. त्यानंतर सांगली जिल्ह्याला १३० कोटी ९१ लाख रुपयांचा निधी प्राप्त झाला. 

दरम्यान, अनेक बॅंकांकडून पात्र खातेदार शेतकऱ्यांच्या याद्या प्राप्त न झाल्याने सदरच्या कर्जमाफीपासून शेतकरी वंचित होते. त्यामुळे पालकमंत्री जयंत पाटील यांनी याबाबत आढावा घेऊन पात्र शेतकऱ्यांच्या कृषी कर्ज खात्यावर रक्कम तात्काळ जमा करावी, अशा सूचना दिल्या होत्या. त्यानुसार जिल्हा उपनिबंधक निलकंठ करे यांनी ज्या बॅंकांकडून खातेधारक शेतकऱ्यांच्या याद्या प्रलंबित होत्या त्यांचा पाठपुरावा करून याद्या उपलब्ध करून घेतल्या. त्यानुसार विविध बॅंकांकडे १२९ कोटी ४४ लाख रुपयांचा निधी कृषी कर्जमाफीसाठी वर्ग करण्यात आला आहे. 

एक्‍सेस बॅंकेकडील पात्र खाते धारकांची यादी प्राप्त होताच उर्वरित रक्कम त्यांच्याही बॅंक खात्यावर वर्ग करण्यात येईल.  - निळकंठ करे,  जिल्हा उपनिबंधक, सांगली