Tur Market Price: शुल्कमुक्‍त वाटाणा आयातीमुळे तूर दबावात

Nagpur News: पिवळ्या वाटाण्याच्या शुल्कमुक्‍त आयातीला मुदतवाढ दिल्यामुळे देशाअंतर्गत बाजारात तुरीचे दर दबावात आले आहेत. २०२४-२५ या वर्षात तुरीला ७५५० रुपये तर २०२५-२६ या वर्षात ८००० रुपयांचा हमीभाव जाहीर करण्यात आला आहे. मात्र बाजारात तुरीचे व्यवहार ६३०० ते ६७५१ रुपये क्‍विंटलने होत आहेत. त्यामुळे उत्पादकांना प्रति क्‍विंटल १००० ते १५०० रुपयांचे नुकसान सोसावे लागत आहे.

केंद्र सरकारने तूर डाळीसह इतर डाळींचे दर ग्राहकांच्या आवाक्‍यात राहावे याकरिता पिवळ्या वाटाण्याच्या आयातीला शुल्कमुक्‍त परवानगी दिली आहे. आयातशुल्क मुक्‍त कालावधी संपुष्टात आला असताना सरकारकडून याला पुन्हा एक वर्षाची मुदतवाढ देण्यात आली. त्यामुळे बाजार समित्यांमध्ये डाळवर्गीय शेतीमालाचे दर दबावात आल्याचे चित्र आहे. मे महिन्याच्या अखेरीस नागपूरच्या कळमना बाजार समितीत तुरीचे दर ६५०० ते ६८५० रुपयांवर होते.

त्यानंतरच्या काळात तुरीचे दर या दरम्यान स्थिर असल्याचे चित्र बाजारात आहे. त्यानंतर आता तुरीच्या दरात पुन्हा घसरण अनुभवली जात आहे. ६३०० ते ६७३० रुपये असा दर तुरीला या आठवड्यात मिळाला. त्यामुळे दरवाढीच्या अपेक्षेने साठवणूक केलेल्या तूर उत्पादकांची चिंता वाढीस लागली आहे. बाजारात तुरीला चांगला दर मिळेल अशी अपेक्षा उत्पादकांना होती. परंतु दर दबावात आल्याने त्यांच्यामध्ये अस्वस्थता आहे. दरात वाढीची कोणतीच शक्‍यता नसल्याने सध्या बाजारात तुरीची आवक वाढती आहे.

२९ मे रोजी ७०० क्‍विंटल तूर आवक असताना आता ती दुपटीने वाढत १५०७ क्‍विंटलवर पोहोचली आहे. शेगाव (बुलडाणा) बाजार समितीत तुरीची ४७ क्‍विंटल इतकी कमी आवक होत असताना दर ५७०० ते ६४७० रुपये क्‍विंटलवर आले आहेत. यवतमाळ बाजार समितीत तुरीला ६३०० ते ६७५५ रुपयांचा दर मिळत असल्याची माहिती व्यापारी सूत्रांनी दिली. कारंजा (वाशीम) बाजार समितीत तुरीचे व्यवहार ५७५५ ते ६३२० रुपयांनी होत असून आवक ११२५ क्‍विंटल इतकी नोंदविण्यात आली.

अमरावती बाजारात दरात घसरण

अमरावती बाजार समितीचा विचार करता दरवाढीची कोणतीच अपेक्षा नसल्याने या बाजार समितीत तुरीची आवक साडेतीन हजार क्‍विंटलवर पोहोचली आहे. ८००० रुपयांचा हमीभाव असताना या ठिकाणी तुरीला अवघा ६४०० ते ६५७७ रुपयांचाच दर मिळत असल्याची माहिती देण्यात आली.