Betel Leaf : खाऊच्या पानास चांगली मागणी; दरही टिकून

Sangli News : राज्यातील पानांच्या पेठांमध्ये खाऊच्या पानांना मागणी वाढली असून उठावही चांगला होत आहे. त्यामुळे बाजारपेठेत पानांचे दर टिकून आहेत. सध्या पानांना प्रतिडागाला (एक डागात १२ हजार पाने) ६०० ते ५५०० रुपये असा दर मिळत आहे. त्यामुळे पान उत्पादकांमध्ये आनंदाचे वातावरण आहे.

मिरज तालुक्याच्या पूर्व भागातील मालगाव, बेडग, आरग, नरवाड, या भागात पान मळ्यांचे क्षेत्र जास्त होते. मात्र गेल्या काही वर्षांत कुशल कामगारांची कमतरता आणि नैसर्गिक संकटामुळे मळ्यांचे क्षेत्र कमी झाले. मात्र शेतकऱ्यांनी बदलते वातावरण, नैसर्गिक आपत्ती अशा प्रतिकूल परिस्थितीत शेतकऱ्यांनी पानमळे टिकवले आहेत. यावर्षी पानांच्या विक्रीचा हंगाम सुरू झाल्यानंतर पानांच्या पेठांमध्ये खाऊच्या पानांची मागणी वाढली आहे. त्यामुळे हंगामाच्या सुरवातीपासूनच पानांना चांगले दर मिळू लागले आहेत.

महाराष्ट्रातील मुंबई, पुणे, नाशिक, रत्नागिरी, लातूर, धाराशिव, पंढरपूर यासह गुजरात, कर्नाटकात सांगली जिल्ह्यातील पानांची विक्री होते. या पानांच्या पेठांतून पानांची मागणी हळूहळू वाढू लागली आहे. त्यामुळे शेतकरी बाजारपेठेच्या मागणीनुसार पानांची खुडा करण्यात व्यस्त आहेत.

मे महिन्याच्या शेवटच्या आठवड्यात आणि जूनच्या पहिल्या आठवड्यात अशी दोन वेळा पानांच्या दरात वाढ झाली आहे. गुजरातसह अन्य राज्यात जुलैमध्ये फाफडा पानांना अधिक मागणी असते. त्यामुळे जुलैमध्ये फाफड्याच्या पानांच्या दरात वाढ होईल, असा अंदाज आहे.

गतवर्षी कमी पाऊस झाल्याने पानांच्या उत्पादनात ३० टक्क्यांनी घट झाली होती. परंतु, बाजारात परराज्यातील पानांची आवक झाली असल्याने पानांना अपेक्षित दर मिळाले नव्हते. मात्र, पानांच्या पेठेत पानांच्या दरात तेजी-मंदी होती. दर टिकून नव्हते. त्यामुळे पान उत्पादकांना काही प्रमाणात आर्थिक फटका बसला.

सध्या सण-उत्सव नसतानाही पानांचे दर टिकून असल्याने शेतकऱ्यांना दिलासा मिळाला आहे. जुलैमध्ये महाराष्ट्र बेंदूर आणि ऑगस्टमध्ये श्रावण महिना सुरू होत आहे. त्यामुळे या दरम्यान, पानांच्या मागणीत वाढ होणार असून दरही वाढतील, अशी शक्यता पान उत्पादकांनी व्यक्त केली आहे.

खाऊच्या पानांचे दर (रुपये) (एका डागात १२ हजार पाने)

मे ः

कळी - १००० ते ४५००

जून ः

कळी - १२०० ते ५५००

फाफडा - २५०० ते ५०००

हक्कल - ६०० ते १३००