Chana Procurement : जालन्यात हरभरा विक्रीसाठी १२६१७ शेतकऱ्यांची नोंदणी

Chana Market Update जालना : जिल्ह्यात आधारभूत किमतीने (Chana MSP) हरभरा खरेदीसाठी (Chana Procurement) मार्केटिंग फेडरेशनच्या माध्यमातून १२ केंद्रे मंजूर असून, यापैकी दहा केंद्रांवर १२६१७ शेतकऱ्यांनी ऑनलाइन नोंदणी केली असल्याची माहिती जिल्हा पणन अधिकारी राजेश हेमके यांनी दिली.

जालना जिल्ह्यात जालना, अंबड, भोकरदन, मंठा, माहोरा, जवखेडा खुर्द, अनवा, बदनापूर, मासेगाव, परतूर, रामनगर, जाफराबाद आदी ठिकाणी हरभरा खरेदी केंद्र मंजूर करण्यात आले आहेत. यापैकी दहा केंद्रे २८ फेब्रुवारी ते १३ मार्च दरम्यान सुरू करण्यात आली आहेत.

या केंद्रावरून नोंदणी केलेल्या १२६१७ शेतकऱ्यांमध्ये जालना केंद्रावरील ४१५८, अंबड ९३, भोकरदन ९३९, मंठा २७६०, माहोरा १५२५, अनवा ५९१, बदनापूर ४८२, मापेगाव ३५२, परतूर ६४५, जाफराबाद १०७२ शेतकऱ्यांचा समावेश आहे.

नोंदणी केलेल्या या शेतकऱ्यांपैकी जालना केंद्रावरून १३, भोकरदन केंद्रावरून १००, मंठा केंद्रावरून ५०, माहोरा केंद्रावरून ४००, बदनापूर केंद्रावरून एक आणि जाफराबाद चंद्रावरून एक मिळून ५६५ शेतकऱ्यांना खरेदीसाठीचे एसएमएस पाठविण्यात आले आहेत.

उर्वरित १२ हजार ५२ शेतकऱ्यांना अजून एसएमएस पाठविणे बाकी आहे. एसएमएस पाठविल्यानंतर मंठा येथील केंद्रावरून १५ शेतकऱ्यांतील ३१३.५० क्विंटल हरभरा ५३३५ रुपये प्रति क्विंटल या आधारभूत किमतीने खरेदी करण्यात आला असल्याचेही श्री. हेमके यांनी कळविले आहे.

जालना जिल्ह्यासाठी आधारभूत किमतीने हरभरा खरेदीसाठी हेक्टरी १४ क्विंटल ५५ किलो हरभरा खरेदीला मंजुरी देण्यात आलेली आहे प्रत्यक्षात जालना जिल्ह्यात एकरी पाच ते दहा क्विंटलपर्यंत हरभरा उत्पादन येते. त्यामुळे उत्पादकता किंचित अडचणीची असल्याचे शेतकऱ्यांचे म्हणणं आहे.