Papaya Cultivation : पपई रोपे बाजारात मुबलक लागवडीस सुरुवात

Jalgaon News : खानदेशात यंदा पपई लागवड अधिक होईल, असे संकेत असतानाच पपईची रोपे बाजारात मुबलक उपलब्ध झाली आहेत. रोपांचे दरही वेगवेगळे आहे. अनेक शेतकरी धाराशिव, जालना व धुळे आणि स्थानिक भागातील रोपवाटिकांमधून रोपे घेत आहेत.

पपई दर टिकून होते. त्या वेळेस पपई रोपांची आगाऊ नोंदणी वाढली. आता अनेक जण लागवड करीत आहेत. पाऊसही चांगला झाला आहे. यामुळे पपई लागवडीसंबंधी शेतकऱ्यांत उत्साह असल्याने रोपांच्या बुकिंगला प्रतिसाद मिळाला आहे. लागवड अधिक होईल, असेही संकेत आहेत.

सध्या नंदुरबार, धुळे, जळगाव भागांत १५ नंबर पपईची लागवड सुरू झाली आहे. ही लागवड नंदुरबारातील शहादा, तळोदा, नंदुरबार, धुळ्यातील शिरपूर, शिंदखेडा, जळगावातील चोपडा, जामनेर, मुक्ताईनगर, रावेर भागांत सुरू आहे.

पपईसाठी खानदेशची ओळख असून, नंदुरबारातील लागवड मात्र कमी होत आहे. यंदा तेथे तीन हजार हेक्टरवर पपई लागवड होईल अशी स्थिती आहे. मागील वेळेसही लागवड कमी झाली होती. २०२२ मध्ये नंदुरबारात पपईची लागवड साडेपाच हजार हेक्टरवर झाली होती.

मागील वर्षी खानदेशात मिळून सुमारे सात हजार हेक्टरवर पपई पीक होते. यंदाही लागवड एवढीच राहील, असे संकेत आहेत. पाऊससमान चांगले आहे. पण पपई दरांबाबत स्थिती चिंताजनक आहे. सध्या पपईची काढणी ठप्प आहे. अनेक जण कच्ची पपई विक्री करून क्षेत्र रिकामे करून घेत आहेत.

पपई लागवडीसंबंधी रोपांची बुकिंग सप्टेंबर, ऑक्टोबरमध्ये झाली असून, विविध कंपन्या, रोपवाटिकाचालकांनी रोप पुरवठा सुरू केला आहे. १५ नंबर व तैवान ७८६ या पपई वाणांसंबंधी आगाऊ नोंदणी करण्यात आली होती. आता रोपांचे पुरवठादार रोपे देऊ लागले असून, शेतकरी लागवड करीत आहेत.

मध्य प्रदेश, गुजरातमधूनही त्यासंबंधी काही रोपवाटिकाचालक नंदुरबार, धुळ्यात रोपे देत आहेत. जळगावातही स्थानिक रोपवाटिकाचालक रोपांची विक्री विविध दरांत करीत आहेत. पपई रोपांचे दर नऊ ते १२ रुपये १५ नंबर वाणाच्या एका रोपासाठी आहेत. तर ७८६ वाणासंबंधीचे दर १३ ते १४ रुपये प्रतिरोप, असे दर आहेत. शेतकरी दोन्ही प्रकारच्या वाणांची मागणी करीत आहेत.

पपईचे दर यंदा सुरवातीला ३० ते ३५ रुपये प्रतिकिलो, असे होते. सध्या दर १४ ते १२ रुपये प्रतिकिलो, असे आहेत. हा दर जागेवर मिळाला. दर मागील १० दिवसांत कमी झाले आहेत. काही शेतकऱ्यांना यापेक्षा कमी दर मिळत आहेत. खरेदीदार खरेदीसाठी नकारही देऊ लागले आहेत. यामुळे लागवडीवर याचा परिणाम होईल, अशी स्थिती आहे.