Papaya Market : खानदेशात पपई आवक घटली

Jalgaon News : खानदेशात पपईची आवक मागील सात ते आठ दिवसांत सुमारे पाच ट्रकनी (एक ट्रक १६ टन क्षमता) घटली आहे. दर्जेदार पपईचे दर नऊ रुपये प्रतिकिलोवर स्थिर आहेत. पुढे उष्णता वाढणार असल्याने आवक आणखी कमी होईल.

उत्तरेकडे अद्याप थंड वातावरण आहे. तेथे पपईस उठाव आहे. पपईची आवक खानदेशात जानेवारीत घटली. त्यात सतत घट होत आहे. डिसेंबर व जानेवारीत पपई दरांचा चार-पाच वेळेस तिढा तयार झाला.

नंदुरबारातील शहादा भागात पपईचे पीकही याच काळात खराब झाले. शेतकऱ्यांनी कमी दर व खराब पीक यामुळे पीक काढले. तेथे सुमारे एक हजार हेक्टरवरील पपईचे पीक काढण्यात आले.

अन्यत्रही पपईची आवक कमी झाली. यातच फेब्रुवारीत पपईची मागणी आली. डिसेंबरमध्ये पपईचे दर सरासरी अडीच रुपये प्रतिकिलो असे जागेवर किंवा शिवार खरेदीत शेतकऱ्यांना मिळाले.

तर जानेवारीत सरासरी तीन रुपये प्रतिकिलोचे दर जागेवर मिळाले. दर ६० ते ६५ दिवस अल्प होते. शेतातच पपई खराब होत होती. परंतु फेब्रुवारीत पपईला उत्तरेकडून मागणी आली. दुसरीकडे आवक कमी होती. यामुळे पपईच्या दरात सुधारणा झाली.

मागील तीन-चार दिवसांत आवक घटली आहे. परंतु दरातही मोठी वाढ झालेली नाही. दरही किमान सात व कमाल नऊ रुपये प्रतिकिलो आहेत. दर्जेदार पपईचे दर नऊ रुपयांपर्यंत आहेत. उत्तर भारतात पपईची पाठवणूक एजंट करीत आहेत.