Onion Market : बफर स्टॉकमधील कांद्याची २५ रुपये प्रतिकिलोप्रमाणे होणार विक्री

Nashik News : मागणीच्या तुलनेत कांद्याची अवाक कमी झाल्याने सध्या बाजारात दरात सुधारणा झाली आहे. देशभर कांद्याच्या किरकोळ दरात वाढ झाल्याने केंद्र सरकारने भाव स्थिरीकरण योजनेअंतर्गत खरेदी केलेला कांदा साठा विक्रीस आणण्याचा निर्णय शुक्रवारी (ता. २७) घेतला. ग्राहकांना दिलासा देण्यासाठी प्रतिकिलो २५ रुपये या सवलतीच्या दराने विक्री करणार असल्याची केंद्र सरकारच्या ग्राहक कल्याण मंत्रालयाच्या वतीने देण्यात आली आहे.

केंद्र सरकारच्या ग्राहक व्यवहार मंत्रालयाच्या माध्यमातून पहिल्या टप्प्यात ३ लाख टन खरेदी केला होता. ऑगस्ट महिन्यात दरात सुधारणा होताच केंद्र सरकारने ४० टक्के निर्यात शुल्क लागू केल्याने शेतकरी व कांदा व्यापारी-निर्यातदार यांच्यामध्ये असंतोष होता. त्यावेळी केंद्र सरकारने पुन्हा २ लाख साठा खरेदीस मान्यता दिली होती.

ही खरेदी नॅशनल कन्झ्युमर को-ऑपरेटिव्ह फेडरेशन ऑफ इंडिया आणि नॅशनल अॅग्रिकल्चरल को-ऑपरेटिव्ह मार्केटिंग फेडरेशन ऑफ इंडियाच्या (नाफेड) यांच्या माध्यमातून २ लाख टन कांदा किरकोळ बाजारात आणणार आहे. हा कांदा २५ रुपये प्रतिकिलो दराने राज्याबाहेर सवलतीच्या दराने विकला जाणार आहे.

भाव स्थिरीकरण योजनेंतर्गत खरेदी केलेल्या कांद्याची ऑगस्ट महिन्यापासून विक्री व पुरवठ्याला सुरुवात झाली होती. मात्र शेतकरी हिताचा कांगावा होत असताना आता पुन्हा दरवाढ झाल्यानंतर पुन्हा कांदा २५ रुपये प्रतिकिलो दराने कांदा विक्री केला जाणार आहे.

मात्र उन्हाळ कांद्याचा साठा संपुष्टात येत आहे. त्यातच नवीन खरीप कांदा अजून एक महिन्यानंतर बाजारात येण्याची चिन्हे आहेत. परिणामी, डिसेंबरपर्यंत कांद्याचे दर वाढतच राहण्याची शक्यता आहे.