Mango Season : सिंधुदुर्ग जिल्ह्यात हापूसची आवक वाढली

Sindhudurg News : जिल्ह्याच्या विविध स्थानिक बाजारपेठांमध्ये सध्या हापूस आंब्याची आवक वाढली आहे. त्यामुळे दरात घट झाली असून सावंतवाडी, कुडाळ या बाजारपेठांमध्ये प्रतिडझन ३०० ते ४०० रुपये दराने आंबाविक्री केली जात आहे. देवगडमध्ये मात्र आंब्याचा दर अजूनही प्रतिडझन ५०० रुपयांवर स्थिर आहे.

जिल्ह्यात महिना-दीड महिना हापूस आंब्याचे दर स्थिर होते. आतापर्यंत देवगड, मालवण, वेंगुर्ला या तालुक्यांतील आंबा वाशीसह राज्याच्या विविध बाजारपेठांमध्ये विक्रीकरिता जात होता. उत्पादन देखील कमी होते. परंतु एप्रिलच्या पहिल्या आठवड्यापासून नियमित हापूस बाजारपेठेत दाखल होण्यास सुरुवात झाली.

त्यामुळे विविध स्थानिक बाजारपेठांमध्ये हापूस विक्रीसाठी उपलब्ध होऊ लागला आहे. सुरुवातीला आंब्याचे दर प्रतिडझन ५०० ते १००० रुपयांपर्यंत टिकून होते. परंतु गेल्या आठवड्यापासून जिल्ह्याच्या उर्वरित भागांतील आंबा हंगामाला सुरुवात झाली आहे.

सावंतवाडी, कुडाळ या भागांतील आंबा बाजारपेठेत दाखल झाला आहे. त्यामुळे सध्या या बाजारपेठांमध्ये हापूस आंब्याची आवक वाढली आहे. आवक वाढल्याने दरात घट होऊन आंबा प्रतिडझन ३०० ते ४०० रुपयांनी ग्राहकांना उपलब्ध होऊ लागला आहे.

कणकवलीत देखील आंब्याचे दर काही प्रमाणात घटले आहेत. असे असले तरी देवगडमध्ये मात्र हापूसचे दर कायम आहेत. या भागामध्ये अद्याप आंब्याची प्रतिडझन ५०० रुपयांनी विक्री सुरू आहे.