Grape Market : दर वाढल्याने द्राक्ष बागा राखण्याची वेळ

Nashik News : द्राक्ष हंगाम अंतिम टप्प्यात आला आहे. तर उत्पादनात ४० टक्के घट असल्याने बाजारात मागणी असल्याने दरात सुधारणा आहे. अशा परिस्थितीत भुरट्या चोरांची नजर द्राक्षबागांवर आहे. मध्यरात्री अंधाराचा फायदा घेऊन भुरटे चोर संधी साधत आहे. या चोरीच्या घटनांमुळे शेतकरी धास्तावले असून द्राक्षबागा राखण्याची वेळ आली आहे.

यंदा माल कमी असल्याने व्यापाऱ्यांकडून मागणी वाढली आहे. स्थानिक व निर्यात अशा बाजारपेठांमध्ये गुणवत्तेनुसार चांगले दर मिळत आहेत. गुणवत्तेनुसार सफेद द्राक्षबागांना प्रति किलो ६० ते ९० रुपयांपर्यंत तर रंगीत वाणाला ९० ते १५० रुपयांपर्यंत दर मिळत आहेत. एकीकडे मिळणाऱ्या दरामुळे शेतकरी समाधानी आहेत. मात्र अशा परिस्थितीत चोरांची नजर द्राक्ष बागांवर पडली आहे.

काही ठिकाणी परप्रांतीय व्यापाऱ्यांकडून फसवणुकीचे प्रकार समोर आले. तर आता द्राक्षाच्या दरात सुधारणा असताना काही भुरटे चोर बागांमध्ये रात्रीच्या वेळी द्राक्ष माल तोडून चोरी करत असल्याचे समोर येत आहे. शेतकरी सकाळी बागेत गेल्यानंतर गल्ल्यांमध्ये वेलींवर घड कमी झाल्याचे दिसून येत आहे. एकीकडे उत्पादन कमी त्यात रात्रीच्या अंधाराचा फायदा घेत चोरट्यांनी द्राक्ष बागांवर डोळा ठेवल्याने द्राक्ष उत्पादकांसमोर आणखी एक संकट उभे राहिले आहे.

निफाड तालुक्यातील सारोळे खुर्द येथे द्राक्ष बागेतून ४ ते ५ क्विंटल द्राक्षांची चोरी झाली होती. तर मध्यरात्री द्राक्ष घड ओरबडून गोणीमध्ये भरून नेताना चोराला शिरवाडे वणी येथे रंगेहाथ पकडून शेतकऱ्यांनी चोप दिला होता. एकीकडे बिबट्यांचे हल्ले वाढत असताना दुसरीकडे काही ठिकाणी जीव धोक्यात घालून बागांमध्ये रात्री चकरा शेतकऱ्यांना माराव्या लागत आहेत.

चोरीनंतर किरकोळ विक्रेत्यांना विक्री

शिरवाडे वणी शिवारात शेतकऱ्यांनी चोरट्याला रंगेहाथ पकडले. त्यातील एक फरार झाला होता. तर एकाला चांगलाच चोप देत पोलिसांच्या ताब्यात देण्यात आले होते. हा चोरलेला द्राक्ष माल किरकोळ विक्रेत्यांना विक्री करत असल्याची कबुली त्या चोरट्याने दिली. सारोळे खुर्द, शिरवाडे वणी, पिंपळगाव बसवंत, पालखेड मिरचीचे या गावांत द्राक्ष चोरी झाल्याचे प्रकार समोर आले आहेत.