Egg Rate : राज्यात अंडी दर पोहोचले प्रतिशेकडा ६३० रुपयांवर

Amaravati News : थंडीत झालेली वाढ त्यासोबतच शालेय पोषण आहारात अंड्यांचा समावेश करण्यात आल्याने अंडी मागणीत राज्यात वाढ नोंदविण्यात आली आहे. त्याच्याच परिणामी अंडी दरात सातत्याने वाढ नोंदविण्यात येत असून दराने प्रतिशेकडा ६३० रुपयांचा टप्पा गाठला आहे. अहमदाबाद (गुजरात) मध्ये अंडी दर प्रतिशेकडा ६२० रुपयांवर पोहोचली आहेत. एकाच दिवसांत प्रतिशेकडा ६१५ वरून पाच रुपयांची वाढ नोंदविली गेली.

राज्यातील पोल्ट्री व्यवसायिकांचे प्रश्‍न सोडविण्यासाठी राज्यस्तरीय समितीचे गठण करण्यात आले आहे. पशुसंवर्धनमंत्री राधाकृष्ण विखे पाटील यांच्या पुढाकाराने पहिल्यांदाच अशाप्रकारची समिती गठीत झाली.

त्यानंतरच्या काळात पोल्ट्री व्यवसायिकांचे प्रश्‍न सोडविण्यासाठी खंबीर भूमिका आयुक्‍त हेमंत वासेकर, सचिव तुकाराम मुंढे यांनी घेतली. त्यामुळेच गेल्या अनेक वर्षांपसून प्रलंबित असलेला शालेय पोषण आहारात अंडी समावेशाच्या मागणीचा मुद्दा अवघ्या काही महिन्यांतच निकाली निघाला.

शाळांना पुरवठ्याकामी पाच रुपये प्रतिनग असा घाऊक दर अंडी खरेदीसाठी निश्‍चित करण्यात आला आहे. त्यामुळेच देशाच्या इतर भागाच्या तुलनेत महाराष्ट्रात अंडी दराने तेजी घेतली आहे. सोलापुरातील अंडी मागणी २५ हजार नगावर पोहोचली आहे. राज्याच्या इतर भागातही अशीच स्थिती आहे. त्यामुळेच गेल्या काही दिवसांपासून महाराष्ट्रात प्रति १०० नग अंडी ६३० रुपयांवर पोहोचली आहेत.

सरासरी ६२८ ते ६३० रुपयांचा दर मिळत असल्याने शेतीपूरक लेअर पोल्ट्री व्यवसाय करणाऱ्या शेतकऱ्यांना चांगलाच दिलासा मिळाला आहे. शालेय पोषण आहारात समावेश कायम राहावा, अशी मागणी त्यांच्यामधून होत आहे.

महाराष्ट्रातील तेजीचा परिणाम देशातील इतर राज्यांमध्ये दिसून येत असून अजमेर (राजस्थान) मार्केटमध्ये अंडी दरात ५८९ रुपयांत १२ रुपयांची वाढ होत शेकडा दर ६०१ रुपयांवर पोहोचले. पंजाबमध्ये देखील ५८८ रुपयांपेक्षा अधिक, इंदूर (मध्य प्रदेश) ५८०, सुरत ६०० रुपये याप्रमाणे व्यवहार होत आहेत.