Dragon Fruit Rate : ड्रॅगन फ्रूटचे दर टिकून

Sangli News : जुलैमध्ये अतिपावसाचा फटका ड्रॅगन फ्रूटच्या तिसऱ्या बहराला बसला, त्यामुळे या बहारातील ड्रॅगन फ्रूटची आवक मंदावली आहे. मात्र मागणी असल्याने दर टिकून आहेत. चौथ्या बहारात पोषक वातावणामुळे फूल कळी चांगली असून येत्या आठ दिवसांत ड्रॅगन फ्रूटची चौथ्या बहरातील फळे विक्रीला येणार आहेत.

गेल्या वीस दिवसांपासून दर टिकून असून सप्टेंबरपासून दरात वाढ होईल, अशी शक्यता ड्रॅगन फ्रूट उत्पादक शेतकऱ्यांनी व्यक्त केली. ड्रॅगन फ्रूटचा हंगाम एक जूनपासून सुरू होतो. सर्वसाधारणपणे नोव्हेंबरअखेर ड्रॅगन फ्रूट बाजारपेठेत विक्रीस येते. तिसऱ्या बहरातील फळांची विक्री सुरू आहे. पहिल्या आणि दुसऱ्या बहरातील फळांना बाजारपेठेत चांगली मागणी असल्याने उठावही झाला.

तिसऱ्या बहरातील फळे ऑगस्टमध्ये विक्रीला येतात. जुलैमध्ये अतिपाऊस झाला, या पावसामुळे तिसऱ्या बहराला फटका बसला. त्यामुळे फूल कळी निघण्यास अडचणी आल्या. परिणामी काही प्रमाणांत उत्पादनात घट झाली आहे. त्यामुळे बाजारात ड्रॅगन फ्रूटची आवक मंदावली असल्याने मागणी वाढली असून दर स्थिर आहेत.

हंगाम सुरू झाल्यापासून आजअखेर अंदाजे १५०० टन ड्रॅगन फ्रूटची विक्री झाली. चौथ्या बहराला पोषक वातावरण असल्याने फूल कळी चांगली निघाली आहे. या बहरातील फळांची विक्री येत्या आठ ते दहा दिवसांत सुरू होईल.

गेल्या पंधरा ते वीस दिवसांपासून ड्रॅगन फ्रूटचे दर टिकून आहेत. सध्या बाजारपेठेत लाल ड्रॅगन फ्रूटला ८० ते १२० रुपये प्रतिकिलो दर आहे. ऑगस्टपासून नोव्हेंबरपर्यंत या कालावधीत ड्रॅगन फ्रूटला मागणी अधिक राहून उठावही चांगला होतो. त्यामुळे येत्या काळात ड्रॅगन फ्रूटला उठाव राहणार असल्याने दर वाढण्याची शक्यता आहे.