Chana Market : विदर्भातील बाजारांत हरभरा दर पाच हजारांवर

Nagpur News : विदर्भातील प्रमुख बाजार समित्यांमध्ये हरभऱ्याचे दर पाच हजार रुपयांच्या खाली होते. आता मात्र हरभऱ्याने पाच हजार रुपयांचा टप्पा गाठला असून त्याच्या परिणामी बाजारात आवकही वाढीस लागली आहे. कळमना बाजारात गेल्या पंधरवाड्यापासून हरभरा आवक अवघी २०० क्‍विंटल असताना दरवाढीनंतर ती वाढून ३५२ क्‍विंटलवर पोहोचली आहे.

सोयाबीन, तूर, हरभरा ही विदर्भाची मुख्य पिके समजली जातात. नागपूरच्या कळमना बाजार समितीत हरभऱ्याचे दर गेल्या महिनाभरापासून दबावात होते. सरासरी ४४०० ते ४८३६ या दराने हरभऱ्याचे व्यवहार होते. तूर दरात सुधारणा झाली असताना हरभऱ्यात दरवाढीची अपेक्षा शेतकऱ्यांना होती. त्यानुसार हरभरा दरात काहीशी सुधारणा गेल्या काही दिवसांत अनुभवली जात आहे.

४७०० ते ४८२८ याप्रमाणे हरभरा दर होते. आवक १२१, १५४ क्‍विंटल अशी होती. आता आवक वाढण्यासोतच दरातही अल्पशी तेजी आली आहे. परिणामी हरभरा विक्रीसाठी थांबलेल्या शेतकऱ्यांना दिलासा मिळण्यास मदत होणार आहे. कळमना बाजार समितीत हरभऱ्याला सध्या ४८०० ते ५१८८ असा दर मिळत आहे.

कारंजा (जि. वाशीम) बाजार समितीतदेखील हरभरा दर तेजीत आहेत. ४९०५ ते ५११० रुपये याप्रमाणे हरभऱ्याचे व्यवहार होत असून आवक २९० क्‍विंटल नोंदविली गेली. शेगाव (जि. बुलडाणा) बाजार समितीत मात्र दर दबावातच असल्याची स्थिती आहे.

या ठिकाणी ४५०० ते ४७२५ असा दर हरभऱ्याला मिळाला. यवतमाळ बाजार समितीत ४६०० ते ५००० असा दर हरभऱ्याला मिळत आहे. यवतमाळमध्ये देखील याच आठवड्यात हरभरा दराने पाच हजार रुपयांचा टप्पा गाठल्याची माहिती बाजार समिती सूत्रांकडून देण्यात आली.