Pune News : देशातील कापूस उत्पादक सध्या कमी उत्पादकता आणि कमी भाव यामुळे अडचणीत आले आहेत. देशातील कापूस उत्पादकांना दिलासा देण्यासाठी केंद्राने ५ वर्षांसाठी कापूस उत्पादकता मिशनची (मिशन फाॅर काॅटन प्रोडक्टीव्हीटी) घोषणा केली आहे.
यातून शेतकऱ्यांना उत्पादन वाढीसाठी अद्यावत तंत्रज्ञान पुरवले जाणार आहे. तसेच अतिरिक्त लांब धागाचे वाण शेतकऱ्यांना उपलब्ध करून देण्यात येणार आहे, अशी घोषणा अर्थमंत्री निर्मला सितारामन यांनी केली.
देशातील कापूस उत्पादकता मागील काही वर्षांपासून कमी होत आहे. जगातील महत्वाच्या अमेरिका, ब्राझील, ऑस्ट्रेलिया, इजिप्त या देशांच्या कापूस उत्पादकतेपेक्षा भारतातील कापूस उत्पादकता खूपच कमी आहे. या देशातील शेतकऱ्यांना तेथील सरकारे अद्यवात बियाणे आणि तंत्रज्ञान पुरवते.
या देशातील हेक्टरी उत्पादकता भारतापेक्षा चार पटीने जास्त आहे. उत्पादकता कमी असल्याने त्यामुळे आंतरराष्ट्रीय बाजारातील चढ उताराचा मोठा फटका देशातील कापूस उत्पादकांना बसत असतो. देशातील कापूस उत्पादकता वाढीसाठी प्रयत्न व्हावेत, अशी मागणी केवळ शेतकरीच नाही तर उद्योगांकडूनही केली जात होती.
भारतात अतिरिक्त लांब धाग्याच्या कापसाचे उत्पादन खूपच कमी होते. त्यामुळे अतिरिक्त लांब धाग्याच्या कापसासाठी भारताला आयातीवर अवलंबून राहवे लागते. भारत दरवर्षी जवळपास १० ते १२ लाख गाठी या कापसाची आयात करतो. भारताला हा कापूस अमेरिका, ऑस्ट्रेलिया तसेच इतर काही देशांमधून पुरवला जातो.
शेतकरी मागील अनेक वर्षांपासून देशातच अतिरिस्त लांब धाग्याच्या बियाणे आणि तंत्रज्ञान पुरवण्याची मागणी करत आहेत. देशातच या कापसाचे उत्पादन झाल्यास आयात कमी होईल. अर्थमंत्र्यांनी आता अतिरिक्त लांब धाग्याच्या कारसाचे वाण शेतकऱ्यांना देण्याची घोषणा केली आहे. त्यामुळे देशातील शेतकऱ्यांना या कापसाच्या उत्पादनातून चांगला भाव मिळेल आणि आयातही कमी होईल.
काय आहे मिशन फाॅर काॅटन प्रोडक्टीव्हीटी?
कापूस उत्पादकता मिशन (मिशन फाॅर काॅटन प्रोडक्टीव्हीटी) ५ वर्षांसाठी असेल. या मिशनमधून कापसाची उत्पादकता वाढीवर लक्ष केंद्रीत केले जाणार आहे. तसेच शाश्वत कापूस उत्पादनासाठी काम केले जाणार आहे.
तसेच अतिरिक्त लांब धाग्याच्या कापसाचे वाण शेतकऱ्यांना देण्यात येणार आहे. कापूस उत्पादकांना अद्यावत तंत्रज्ञान पुरवले जाणार आहे. कापूस उद्योगासाठी ५ एफ धोरण राबविले जाणार आहे. या धोरणाच्या माध्यमातून देशातील कापड उद्योगाला गुणवत्तापूर्ण कापसाचा सुरळीत पुरवठा करण्यावर जोर दिला जाणार आहे.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
