Silkworm Market : दहा दिवसांत ५७ क्विंटल रेशीम कोषाची आवक

Chhatrapati Sambhajinagar News : राज्यात सर्वप्रथम प्रायोगिक तत्त्वावर सुरू झालेल्या जालना उच्चतम कृषी उत्पन्न बाजार समितीमधील रेशीम कोष खरेदी बाजारपेठेत २ ते १२ डिसेंबर दरम्यान ५७ क्विंटल रेशीम कोषाची आवक झाली.

यंदा १२ डिसेंबरपर्यंत २३४.७ टन रेशीम कोषाची आवक झाली होती. जालना उच्चतम कृषी उत्पन्न बाजार समितीमध्ये सुरू असलेल्या रेशीम कोष खरेदी बाजारपेठेत होत असलेली आवक लक्षात घेता यंदा वर्षखेरपर्यंत किमान ५०० टन रेशीम कोषाची आवक होण्याचा जाणकारांचा अंदाज आहे.

२ डिसेंबरला गत दहा दिवसांतील सर्वाधिक २० क्विंटल आवक झालेल्या रेशीम कोषाला ३७ हजार ५०० ते ६७ हजार ५०० रुपये प्रतिक्विंटल दरम्यान, तर सरासरी ६१ हजार रुपये प्रतिक्विंटलचा दर मिळाला होता. ३ डिसेंबरला ६ क्विंटल आवक झालेल्या रेशीम कोषाचे सरासरी दर ६० हजार रुपये प्रतिक्विंटल राहिले.

४ डिसेंबरला ४ क्विंटल आवक झालेल्या रेशीम कोषाला सरासरी ५८ हजार ५०० रुपये प्रतिक्विंटलचा दर मिळाला. ५ डिसेंबरला आवक ५ क्विंटल झाली, यासाठी सरासरी दर ६८ हजार रुपये प्रतिक्विंटल राहिला. ६ डिसेंबरला ५ क्विंटल आवक झालेल्या कोषाला सरासरी ५५ हजार प्रति क्विंटलचा दर मिळाला.

७ डिसेंबरला एक क्विंटल आवक झालेल्या कोषाचे दर ४९ हजार रुपये प्रतिक्विंटल राहिले. ९ डिसेंबरला आवक २ क्विंटल, तर सरासरी दर ३९ हजार प्रतिक्विंटल राहिले. १० डिसेंबरला ३ क्विंटल आवक झालेल्या कोषाला ५६,५०० रुपये दर मिळाला. ११ डिसेंबरला रेशीम कोषाची आवक ४ क्विंटल, तर सरासरी दर ४७ हजार राहिला. १२ डिसेंबरला ७ क्विंटल आवक झालेल्या कोषाला सरासरी ४३, ५०० रुपये दर मिळाला. या वेळी कोषाचे किमान दर ३६,५०० रुपये होते, अशी माहिती बाजार समितीच्या वतीने देण्यात आली.

बीडला सर्वाधिक आवक

रेशीम कोष खरेदी सुरू असलेल्या जालना, बीड, बारामती, बडनेरा आणि पूर्णा या बाजारपेठांमध्ये कमी अधिक प्रमाणात रेशीम कोषांची आवक होते आहे. त्यामध्ये सर्वाधिक आवक बीड येथील रेशीम कोष खरेदी बाजारपेठेत होत असून, त्यानंतर जालना, बारामती, बडनेरा व पूर्णा येथील बाजारपेठेचा क्रमांक लागतो.