Soybean Market : सोयाबीन बाजाराला मिळू शकतो खाद्यतेल दरवाढीचा आधार

Pune News : सोयाबीन दराला आत्तापर्यंत सोयापेंडकडून (Soyameal) आधार होता. पण सोयातेलाचे भाव दबावात होते. भारतात आयातही जास्त झाल्यानं दबाव जास्त होता. मात्र चालू आठवड्यात आंतरराष्ट्रीय बाजारात सोयातेलाचे भाव सुधारले.

त्यातच देशातून सोयापेंड निर्यात (Soyameal Export) वाढली आहे. त्यामुळे सोयाबीन बाजाराला आधार मिळू शकतो, असा अंदाज सोयाबीन बाजारातील अभ्यासकांनी व्यक्त केला.

चालू आठवड्याचा विचार करता सोयाबीन (Soybean) आणि सोयापेंडचे वायदे आंतरराष्ट्रीय बाजारात नरमले. सोमवारी सोयाबीनचे वायदे १५.४४ सेंट प्रतिपाऊंडवर सुरु झाले होते. रुपयात हा दर जवळपास ४ हजार ७०० रुपये होतो.

तर शुक्रवारी सोयाबीनचे वायदे १५.२७ सेंट प्रतिपाऊंडवर बंद झाले. म्हणजेच ४ हजार ६४० रुपयांवर आठवड्याचा बाजार बंद झाला. याचाच अर्थात असा की सोयाबीन वायद्यांमध्ये ७० रुपयांची नरमाई आली.

सोयापेंडचा विचार करता सोमवारी वायदे ५०० डाॅलरवर होते. ते शुक्रवारी ४९० डाॅलरवर बंद झाले. म्हणजेच या आठवड्यात सोयापेंडचे वायदे १० डाॅलरने नरमले.

सोयातेलाचे दर मात्र या आठवड्यात वाढले. सोमवारी सोयातेलाचे वायदे ६०.४७ सेंट प्रतिपाऊंडवर होते ते शुक्रवारी ६१.४८ सेंटवर पोचले. इंडोनेशियाने सोयातेल निर्यातवर काही निर्बंध आणले आहेत. त्यामुळं पामतेलच्या दरात सुधारणा झाली.

पामतेलाने ४ हजार रिंगीट प्रतिटनाचा टप्पा पार केला. परिणामी सोयातेलालाही आधार मिळाला.

देशातील दरपातळी

देशातील सोयाबीन बाजारासाठी हा आठवडा मात्र तेवढा आशादायक नव्हता. सोयाबीनची बाजारातील आवक स्थिर असूनही दर वाढले नाहीत. देशातून सोयापेंड निर्यात वाढल्यानं दरवाढीची अपेक्षा होती.

पण आठवडाभर दरपातळी ५ हजार १०० ते ५ हजार ५०० रुपयांच्या दरम्यान राहिली. म्हणजेच चालू आठवड्यात बाजार समित्यांमधील दरात वाढ जाणवली नाही.

सोयातेलाचे दरवाढीची शक्यता

देशातून सध्या सोयापेंडची निर्यात वेगाने सुरु आहे. भारतीय सोयापेंडला मागणी टिकून आहे. आता खाद्यतेलाचेही दर वाढले. परिणामी सोयातेलाच्याही दरात सुधारणा दिसून आली.

म्हणजेच पुढील आठवड्यात पामतेल आणि सोयातेलाच्या दरात आणखी वाढ दिसू शकते, असा अंदाज व्यक्त केला जातोय. असं झाल्यास सोयाबीन बाजारालाही आधार मिळू शकतो, अशा अंदाज सोयाबीन बाजारातील अभ्यासकांनी व्यक्त केला.