Moong Market : मुगाला प्रति क्विंटल आठ हजार रुपये दर

Pune News : शिरूर येथील शिरूर कृषी उत्पन्न बाजार समितीच्या महात्मा फुले उपबाजारात शनिवार (ता.१७) पासून मुगाची आवक सुरू झाली असून, पहिल्याच दिवशी ११ क्विंटल मुगाची आवक झाली. चांगल्या दर्जाच्या मुगाला सुमारे ६ हजार ५०० रुपये ते आठ हजार रुपये प्रति क्विंटलपर्यंत बाजारभाव मिळाला असल्याची माहिती सचिव अनिल ढोकले यांनी दिली.

यंदा वेळेवर पाऊस झाल्याने अनेक शेतकऱ्यांनी जूनमध्ये मुगाच्या पेरणीस सुरुवात केली होती. तालुक्यात मुगाचे सरासरी १२ हजार ६९० हेक्टर क्षेत्र आहे. त्यापैकी ११ हजार ५ हेक्टर म्हणजेच ८७ टक्के पेरणी झाली. त्यानंतर झालेल्या अधूनमधून पावसामुळे तालुक्यात मुगाचे चांगले पीक आले होते. सध्या लवकर पेरणी केलेल्या मुगाची काढणी सुरू झाली आहे. त्यामुळे अनेक शेतकरी मूग काढणीच्या कामांत गुंतले असले तरी ज्या शेतकऱ्यांनी काढणी केली आहे, असे शेतकरी आर्थिक अडचणीमुळे बाजारात विक्रीसाठी मूग आणत आहे.

सध्या हंगामातील ही पहिल्यांदाच आवक सुरू झाली आहे. पावसाने उघडीप दिल्याने व वाळवण चांगली होत असल्याने सुमारे अकरा क्विंटल मुगाची आवक झाली. चांगल्या दर्जाच्या मुगाला ८ हजार रुपये प्रति क्विंटल बाजारभाव मिळाला असून शेतकऱ्यांच्या सोयीसाठी येथील उपबाजारात आठवड्यातील सातही दिवस मुगाचा बाजार सुरू करण्यात आला. दरम्यान, येथील उपबाजारात मुगाच्या खरेदी-विक्रीसाठी शेतकरी व व्यापारी यांच्यासाठी बाजार समितीने विविध प्रकारच्या सुविधा निर्माण केल्या असून, शेतकऱ्यांच्या मालाला चांगला बाजारभाव मिळण्यासाठी प्रयत्न करण्यात येत आहे.

येथील उपबाजारात शिरूरसह श्रीगोंदा, पारनेर, दौंड, हवेली, खेड आदी तालुक्यांतून शेतकरी मूग विक्रीसाठी आणतात. शेतकऱ्यांनी येथील बाजारात वाळवून चांगल्या दर्जाचा मूग आणतात. सध्या शिरूर तालुक्यातील करडे, कान्हूर मेसाई, आंबळे, बांबरडे, कवठे यमाई, मलठण, धामारी, पाबळ या भागांतून मुगाची आवक सुरू झाली आहे.