Soybean Market News : अकोल्यात सोयाबीनची ४७ हजार क्विंटल आवक

Akola News : येथील कृषी उत्पन्न बाजार समितीत शनिवारी (ता. २८) सोयाबीनची विक्रमी साडे अकरा हजार क्विंटल आवक झाली. गेल्या आठवड्यात सोयाबीनने ४७ हजार क्विंटल आवकेचा टप्पा ओलांडला. सरासरी दरात थोडी सुधारणासुद्धा दिसून आली.

येथील बाजार समित्यात योग्य दर मिळत असल्याने जिल्‍ह्यासह इतर भागांतूनही सोयाबीनची मोठ्या प्रमाणात आवक येथे सुरू आहे. सोयाबीनला येथे सरासरी दर ४६०० रुपये प्रतिक्विंटल मिळत आहे.

अकोला ही पश्चिम विदर्भातील सर्वांत मोठी बाजार समिती म्हणून ओळखली जाते. या ठिकाणी दररोज विविध प्रकारच्या शेतीमालाची हजारो क्विंटलची आवक आणि उलाढाल होते. सध्या ही बाजार समिती सोयाबीनने फुललेली आहे.

बाजार समितीत आठवडाभरात तब्बल ४७ हजार क्विंटलपेक्षा अधिक आवक झाली. सोयाबीनला किमान दर ४००० व कमाल दर ४८०० रुपये मिळत आहे. यंदाचा सोयाबीन हंगाम जोरावर आलेला आहे.

सर्वत्र सोयाबीनची सोंगणी, मळणी जोमाने सुरू आहे. मजुरांची मागणी वाढलेली असून काही भागांत हार्वेस्टरनेही मळणीला वेग आला आहे. सोयाबीन मळणीसाठी विविध राज्यांतून यंत्रे दाखल झाली आहेत.

खरेदीसाठी चढाओढ

येथील बाजार समितीत सोयाबीन खरेदीसाठी चढाओढ सुरू असल्याने येथील दरसुद्धा इतर बाजार समित्यांच्या तुलनेत चांगला आहे. यामुळे विविध भागांतील शेतकरी सोयाबीन विक्रीसाठी आपला माल येथील बाजारात घेऊन येत आहेत.

सोयाबीनची आवक वाढल्याने मध्यंतरी एक दिवस बाजारात सोयाबीनची आवक बंद ठेवावी लागली होती. आणखी काही दिवस ही आवक कायम राहण्याची शक्यता व्यापारी सूत्रांकडून व्यक्त करण्यात आली.

आठवडाभरातील आवक (क्विंटलमध्ये)

तारीख आवक

२८ ऑक्टोबर ११९६८

२७ ६८२९

२६ ६२१६

२५ ६१२८

२३ ५२७०

२२ ५८४२

२१ ५७१३