Betel Leaf Rate: खाऊच्या पानांच्या दरात घट

Sangli News: खाऊच्या पानांना पान बाजारपेठेत मागणी कमी असल्याने अपेक्षित उठावही होत नाही. त्यातच दराच्या अस्थिरतेमुळे मंदीचे ग्रहण लागले आहे. त्यामुळे पान उत्पादक शेतकऱ्यांना आता पान बाजारपेठेतील अस्थिर दराचा फटका सहन करावा लागत आहे. सद्यःस्थितीला पानांच्या दरात सुमारे ३० टक्क्यांनी घट झाली असल्याचे पान उत्पादक शेतकऱ्यांनी सांगितले.

जूनमध्ये अति पावसामुळे कोकणसह अन्य भागांतील पानांच्या पेठा काही अंशी बंद ठेवण्यात आल्या होत्या. त्यामुळे पानांची मागणी आणि उठावही कमी झाला होता. याचा परिमाण दरावर होऊन शेतकरी हतबल झाले होते. मात्र काही दिवसांपासून पावसाने उघडीप दिली आहे. त्यामुळे पुन्हा पानांच्या पेठा सुरळीत सुरू होतील, अशी आशा शेतकऱ्यांना होती.

आठ ते पंधरा दिवसांपासून काही भागांतील बाजारपेठा सुरू झाल्या आहेत. परंतु अजूनही पानांची मागणी कमी आहे. त्यामुळे अपेक्षित उठावही नसल्याचे व्यापारी शेतकऱ्यांना सांगत आहेत. त्यामुळे दर कमी मिळत असल्याचे चित्र आहे. सद्यःस्थितीला कळी पानाच्या डागाला (एक डाग १२ हजार पानांचा) १५०० ते २५०० रुपये, तर हक्कल पानाच्या डागाला ८०० ते १५०० रुपये असा दर मिळत आहे.

जूनच्या तुलनेत सध्या पानांच्या दरात सुमारे ३० टक्क्यांनी घट झाली आहे. जूनमध्ये कळी पानाच्या एका डागाला २५०० ते ३००० रुपये दर होते. मेमध्ये पानांची आवक कमी होती, उठाव असल्याने दरात काहीशी सुधारणा झाली होती. जूनमध्ये पानांचे दर सुधारतील, अशी आशा होती. मात्र जूनमध्ये दर दबावात होते. जुलैमध्ये पानांची मागणी वाढण्याऐवजी कमी झाल्याने पुन्हा दर कमी झाले आहेत.

श्रावणात दर वाढणार का?

२५ जुलैपासून श्रावण सुरू होत आहे. श्रावणात पूजेसाठी पानांची मोठी मागणी असते. दरवर्षी श्रावणात पानांच्या दरात सुधारणा होते. परंतु दोन महिन्यांपासून पानांचे दर दबावात असल्याने यंदाच्या श्रावणात दरात वाढ होणार का, असा प्रश्‍न शेतकरी उपस्थित करू लागले आहेत.