Gokul Milk Rate : ‘गोकूळ’च्या म्हैस, गायीच्या दूध खरेदीदरात २ रुपये वाढ

Gokul Milk Rate Update कोल्हापूर : ‘‘कोल्‍हापूर जिल्‍हा सहकारी दूध उत्‍पादक संघाने (गोकूळ) म्हैस व गाय दूध खरेदी दरात प्रतिलिटर २ (Milk Rate) रुपये वाढ केली आहे.

‘गोकूळ’शी संलग्न दूध उत्पादक शेतकऱ्यांना म्‍हैस व गाय दूध खरेदी दरा‍त शनिवारपासून (ता.१) वाढ करण्यात आली. संचालक मंडळाच्‍या बैठकीत हा निर्णय घेण्‍यात आला,’’ अशी माहिती संघाचे अध्यक्ष विश्‍वास पाटील यांनी दिली.

या दूध खरेदी दरवाढीमुळे दररोज सरासरी ३० लाख रुपये म्हणजेच प्रतिमहिना ९ कोटी रुपये रक्कम ‘गोकुळ’च्या दूध उत्पादकांना दूधबिलापोटी अतिरिक्त मिळणार असल्याचे त्यांनी सांगितले.

११ फेब्रुवारीपासून म्‍हैस दूध खरेदी दर ६.० फॅट व ९.० एस. एन. एफ प्रतीचे दुधास प्रतिलिटर रुपये ४९.५० दर राहील. गाय दूध खरेदी दर ३.५ फॅट व ८.५ एसएनएफ प्रतीचे दुधास प्रतिलिटर रुपये ३७.००असा दर राहणार आहे.

पाटील म्हणाले, ‘‘सध्या गोकुळचे दैनंदिन दूध संकलन सरासरी १५ लाख लिटर्स असून यापैकी म्हैस दूध ८ लाख ५० हजार लिटर्स व गाय दूध ६ लाख ५० हजार लिटर्स इतके आहे. दरम्यान दूध खरेदी दरवाढीचे सुधारित दरपत्रक संघामार्फत प्राथमिक दूध संस्थांना पाठविण्यात येईल.’’