Weather News : पुणे : राज्यात पूर्वमोसमी पावसाला पोषक हवामान होत असल्याने ढगाळ हवामान (CLOUDY WEATHER) होत कमाल तापमानात घट झाली आहे. विदर्भ, मराठवाडा आणि उत्तर महाराष्ट्रात उन्हाचा चटका कायम आहे.

आज (ता. ३०) कोकण, मध्य महाराष्ट्र आणि मराठवाड्याच्या दक्षिण भागासह विदर्भात वादळी पावसाचा इशारा हवामान विभागाने दिला आहे.

सोमवारी (ता. २९) सकाळपर्यंतच्या २४ तासांमध्ये विदर्भातील वर्धा येथे राज्यातील उच्चांकी ४२.५ अंश सेल्सिअस तापमानाची नोंद झाली. तर विदर्भात, उत्तर महाराष्ट्र आणि मराठवाड्यात कमाल तापमान चाळीशीपार आहे.

उर्वरित राज्यात तापमान ३४ ते ४० अंशांच्या दरम्यान आहे. कमाल तापमानात चढ-उतार होत असले तरी, उष्ण व दमट हवामानामुळे उन्हाच्या झळा आणि उकाडा कायम आहे.

नैॡत्य राजस्थान आणि परिसरावर चक्राकार वाऱ्यांची स्थिती आहे. त्यापासून दक्षिण उत्तर प्रदेशापर्यंत हवेचा कमी दाबाचा पट्टा आहे.

यातच दक्षिण छत्तीसगड परिसरावर, तसेच दक्षिण तेलंगणा आणि परिसरावर चक्राकार वाऱ्यांच्या स्थिती आहेत. दक्षिण छत्तीसगड पासून तमिळनाडू पर्यंत हवेचा कमी दाबाचा पट्टा सक्रिय आहे.

आज (ता. ३०) राज्यात उष्ण व दमट हवामानाबरोबरच आकाश ढगाळ होण्याची शक्यता आहे. दक्षिण कोकण, मध्य महाराष्ट्र, मराठवाडा आणि विदर्भात ताशी ३० ते ४० किलोमीटर वेगाने वारे वाहून, मेघगर्जना, विजांसह, पावसाची शक्यता आहे.

सोमवारी (ता. २९) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअस मध्ये) : पुणे ३७.२ (२३.३), जळगाव ४१.३ (२४.७), धुळे ४० (२३.५), कोल्हापूर ३६.६ (२३.९), महाबळेश्वर ३१.६ (१७.६), नाशिक ३६.९ (२४.२), निफाड ३८.२ (२३.२), सांगली ३९.२ (२३.४), सातारा ३८.८ (२२), सोलापूर ४१.६ (२६.६),

सांताक्रूझ ३४.४ (२८.४), डहाणू ३५.८ (२८.९), रत्नागिरी ३५.१ (२७.१), छत्रपती संभाजीनगर ४० (२३), नांदेड ४० (२८.८), परभणी ४१.७ (२८), अकोला ४२.२ (२५), अमरावती ४१.६(२४.७), बुलडाणा ४० (२२.६), ब्रह्मपुरी ४१.२ (२५.६), चंद्रपूर ४२.४(२७.२), गोंदिया ४१.२ (२४.४), नागपूर ४०.८ (२३.७), वर्धा ४२.५(२५.५), वाशीम ४१ (२३.८) यवतमाळ ४१ (२२.२).

मॉन्सूनची आज प्रगती शक्य
नैॡत्य मोसमी वारे (मॉन्सून) १९ मे रोजी दक्षिण बंगालचा उपसागर, दक्षिण अंदमान समुद्र आणि निकोबार बेटांवर दाखल झाले. मात्र त्यानंतर आठवडाभराहून अधिक काळ मॉन्सूनची चाल मंदावली आहे. सोमवारी (ता. २९) मॉन्सूनच्या प्रगतीची स्थिती ‘जैसे थे’ आहे.

आज (ता. ३०) दक्षिण बंगालचा उपसागर, अंदमान समुद्राचा आणखी काही भाग, तसेच अंदमान बेटांच्या काही भागात मॉन्सूनची प्रगती होण्याची शक्यता आहे.


वादळी पावसाचा इशारा
कोकण : रत्नागिरी, सिंधुदुर्ग.
मध्य महाराष्ट्र : नगर, पुणे, सातारा, सोलापूर, सांगली, कोल्हापूर.
मराठवाडा : परभणी, हिंगोली, नांदेड, लातूर, धाराशिव
विदर्भ : वाशीम, अमरावती, यवतमाळ, वर्धा, गोंदिया, गडचिरोली.

उन्हाचा चटका अधिक असलेली ठिकाणे :
वर्धा ४२.५, चंद्रपूर ४२.४, अकोला ४२.२.