Pune News : बंगालच्या उपसागरावरील डाना चक्रीवादळाने आज दुपारी १ वाजून ३० मिनिटाच्या दरम्यान उत्तर ओडिशाच्या किनारपट्टी जवळच्या धामरा आणि भितरनिका बेटांना ओलांडलं आहे. आता चक्रीवादळाचा जमिनीवरील प्रवास सुरू आहे. डानाने उपसागरावरील वाटचाल प्रतिताशी १०० ते ११० किलोमीटर इतक्या वेगाने केली.

डाना चक्रीवादळाचा जमिनीवरील प्रतिताशी वेग ७५ ते ८५ किलोमीटरच्या दरम्यान आहे. पुढील काही तासात डानाची तीव्रता कमी होईल. पुढील ६ तासांमध्ये चक्रीवादळाचं डीप डिप्रेशन तयार होईल. परिणामी ओडिशाची किनारपट्टी, पश्चिम बंगालच्या दक्षिण गंगेच्या भागात काही ठिकाणी अति मुसाळधार पावसाची शक्यता हवामानशास्त्र विभागाने वर्तवली आहे. राज्यात मात्र डानाचा परिणाम जाणवणार नाही.

राज्यातील विविध भागात पुढील दोन दिवस प्रामुख्याने कोरड्या हवामानाचा अंदाज वर्तवण्यात आला आहे. तर रविवारपासून काही भागात पाऊस जोर धरण्याची शक्यता हवामान शास्त्र विभागाने वर्तवली आहे.

रविवारी विदर्भातील चंद्रपुर, गडचिरोली, नागपुर, वर्धा तसेच सोमवारी जळगाव, अहिल्यानगर, सांगली, सोलापूर, छत्रपती संभाजीनगर, जालना, परभणी, हिंगोली, नांदेड,  अमरावती, भंडारा, चंद्रपुर, नागपूर, वर्धा, वाशिम, यवतमाळ जिल्ह्यात तुरळक ठिकाणी वाऱ्यासह मध्यम पावसाचा इशारा देण्यात आला आहे. 

तसेच मंगळवारी रायगड, रत्नागिरी, सिंधुदुर्ग, जळगाव, अहिल्यानगर, पुणे, पुण्याचा घाटमाथा, कोल्हापूर आणि कोल्हापूरचा घाटमाथा, सातारा आणि साताराच्या घाटमाथा, सांगली, सोलापूर, छत्रपती संभाजीनगर, जालना, परभणी, बीड, हिंगोली, नांदेड, लातूर, धाराशिव, अकोला,  अमरावती,  वाशिम आणि यवतमाळ जिल्ह्यात तुरळक ठिकाणी वारे आणि विजासह पावसाची शक्यता हवामानशास्त्र विभागाने वर्तवली आहे.