Pune News : देशातील बहुतांशी भागांमध्ये किमान तापमानात वाढ झाली. तर अनेक ठिकाणी सकाळी गारठा जाणवत आहे. राज्यातही सकाळी गारवा आणि दुपारी उन्हाचा चटका अशी परिस्थिती आहे. 

उत्तर भारतातील बहुतांशी भागात किमान तापमान ११ अंश सेल्सिअस ते १४ अंश सेल्सिअसच्या दरम्यान आहे. ईशान्य भारतातील तापमानापेक्षा हे तापमान २ अंश सेल्सिअस ४ अंश सेल्सिअसच्या दरम्यान होते.

राजस्थानमधील चुरु येथे जमिनीवरील सर्वात कमी तापमानाची नोंद झाली. चूरू येथे ६.६ अंश सेल्सिअस तापमान होते. याशिवाय हिमाचल प्रदेश, उत्तराखंड, पंजाब, हरियाना आणि उत्तर राजस्थानमधील काही भागांमध्ये गारपीट होण्याची शक्यता असल्याचे हवामान विभागाने म्हटले आहे.

तर ईशान्य भारत आणि उत्तर भारतातील काही भागात पावसाचाही इशारा हवामान विभागाने दिला. राज्यातील अनेक भागात सकाळी वातावरणात काहीसा गारवा जाणवत आहे. पण दुपारी उन्हाचा चटकाही असह्य होत आहे.

मध्य महाराष्ट्र, मराठवाडा, विदर्भ तसेच कोकणातील सरासरी तापमानात वाढ झाली. राज्यात पुढील पाचही दिवस हवामान कोरडे राहण्याचा अंदाज आहे, असेही हवामान विभागाने स्पष्ट केले.