Konkan Rain News : पुणे : मॉन्सूनचा आस उत्तरेकडे सरकल्याने राज्यात पावसाने उघडिप दिली आहे. तुरळक ठिकाणी हलक्या ते मध्यम पावसाच्या सरी पडत आहेत. आज (ता. १०) दक्षिण कोकणात तुरळक ठिकाणी जोरदार पावसाची शक्यता आहे. उर्वरित राज्यात ढगाळ आकाश, ऊन-सावल्यांच्या खेळात तुरळक ठिकाणी हलक्या पावसाचा अंदाज हवामान विभागाने वर्तविला आहे.

आग्नेय बिहार आणि परिसरावर समुद्र सपाटीपासून ७.६ किलोमीटर उंचीपर्यंत चक्राकार वारे वाहत आहेत. मॉन्सूनचा आस असलेला कमी दाबाचा पट्टा त्याच्या सर्वसाधारण स्थितीच्या उत्तरेकडे कायम आहे. हा आस पंजाबच्या अमृतसर, चंडीगड, नाझीबाबाद, गोरखपूर, सुपौल, बालूरघाट ते मणिपूरपर्यंत विस्तारला आहे. पुढील चार ते पाच दिवस मॉन्सूनचा आस हिमालयाच्या पायथ्याकडे राहण्याची शक्यता आहे.

हिमालयाच्या पायथ्याकडे गेलेला मॉन्सूनचा आस, किनारपट्टीला समांतर कमी दाब पट्ट्याचा अभाव यामुळे मॉन्सूनच्या प्रवाहात पडलेला खंड कायम आहे. राज्यात अनेक भागांत मुख्यतः पावसाची उघडीप असून, ढगाळ हवामानासह उकाडा जाणवत आहे. काही ठिकाणी ऊन पावसाच्या खेळात श्रावणसरी कोसळत आहेत. आज (ता. १०) दक्षिण कोकणातील रत्नागिरी, सिंधुदुर्ग जिल्ह्यांत तुरळक ठिकाणी जोरदार पावसाची, तर उर्वरित राज्यात मुख्यतः पावसाची उघडिपीसह तुरळक ठिकाणी हलक्या पावसाचा अंदाज हवामान विभागाने वर्तविला आहे.