Pune News : उत्तर भारतात किमान तापमान घटलेले आहे. तर दक्षिण भारतातील काही भागात हलक्या ते मध्यम पावसाची हजेरी सुरु आहे. तमिळनाडू आणि केरळ राज्यातील अनेक भागात पाऊस लावत आहे. तर महाराष्ट्रात काही भागात हवेतील गारवा काहीसा वाढला आहे.

उत्तर भारतातील किमान तापमान कमीच आहे. त्यामुळे थंडीचा कडाका जाणवत आहे. तर नैऋत्य बंगालच्या उपसागरात आणि शेजारच्या भागात चक्राकार वाऱ्याची स्थिती निर्माण झाली आहे. तसेच दक्षिण भारतात काही ठिकाणी पाऊस पडत आहे.

तमिळनाडू, केरळ आणि शेजारच्या भागात १५ डिसेंबर, १८ डिसेंबर आणि १९ डिसेंबर रोजी मध्यम पावसाचा अंदाज आहे. तर १६ आणि १७ डिसेंबर रोजी हलक्या सरी पडतील, असेही हवामान विभागाने स्पष्ट केले.

राज्यात आता थंडी काही प्रमाणात वाढत आहे. सकाळी हवेतील गारवा जाणवत आहे. पण अद्यापही राज्यात कडाक्याची थंडी नाही. राज्यातील अनेक भागात किमान तापमानात काहिशी घट झाली. तसेच पुढील पाच दिवसही राज्यातील तापमान कोरडे राहण्याचा अंदाज आहे. राज्यातील कोणत्याही भागात सध्या तरी पावसाचा अंदाज नसल्याचे हवामान विभागाने स्पष्ट केले.