Monsoon Rain : नैर्ऋत्य मोसमी वाऱ्यांनी (मॉन्सून) सलग दुसऱ्या दिवशी अरबी समुद्रातील वाटचाल सुरूच ठेवली आहे. शुक्रवारी (ता. २) लक्षद्वीप बेटांचा काही भाग, दक्षिण श्रीलंकेत मॉन्सूनने प्रगती केल्याचे हवामान विभागाने जाहीर केले.

यंदा सर्वसाधारण वेळेच्या दोन दिवस आगोदरच, १९ मे रोजी मॉन्सून दक्षिण बंगालचा उपसागर, निकोबार बेटे आणि दक्षिण अंदमान समुद्रात मॉन्सून दाखल झाला. त्यानंतर मॉन्सूनची वाटचाल थांबली होती.

मंगळवारी (ता. ३०) संपूर्ण अंदमान, निकोबार बेटसमुह आणि अंदमान समुद्रासह पूर्व-मध्य बंगालच्या उपसागराच्या काही भागात, तर गुरूवारी (ता. १) अरबी समुद्रात मॉन्सून दाखल झाला.

शुक्रवारी (ता. २) मॉन्सूनने दक्षिण अरबी समुद्र, आणि मालदीवचा आणखी काही भाग, संपुर्ण कोमोरीन भाग, लक्षद्वीप बेटांचा काही भाग आणि दक्षिण बंगालचा उपसागर आणि पूर्व-मध्य बंगालच्या उपसागराच्या आणखी काही भागात प्रगती केली आहे.

यंदा केरळातील मॉन्सूनचे आगमन लांबले असून, ४ जून पर्यंत मॉन्सून केरळमध्ये दाखल होण्याची शक्यता हवामान विभागाने यापुर्वीच वर्तविली आहे.

दरम्यान, यंदा देशात सरासरी ९६ टक्के पावसाची शक्यता हवामानशास्त्र विभागाने वर्तवली आहे.