पुणे : राज्यातील तापमानातील वाढ कायम आहे. किमान तापमानातही वाढ होत आहे. राज्यातील अनेक भागात तापमान ३९ अंशावर पोचले आहे. तर कोकण आणि विदर्भात उन्हाची ताप चांगलीच वाढली आहे. हवामान विभागाने राज्यातील तापमानात वाढ होण्याचा अंदाज व्यक्त केला.

कोकणातील सिंधुदूर्ग, रत्नागिरी, रायगड, मुंबई, ठाणे आणि पालघर जिल्ह्यात काही ठिकाणी आजही उष्ण आणि दमट हवामान होते. तर दुसरीकडे विदर्भातही उन्हाची ताप चांगलीच वाढली आहे. अकोला येथे आज सकाळपर्यंतच्या २४ तासांमध्ये राज्यातील सर्वाधिक ३९.५ अंश सेल्सिअस तापमानाची नोंद झाली होती. रत्नागिरी येथेही ३९.४ अंश आणि मुंबईतील सांताक्रझ येथे ३९.२ अंश सेल्सिअस तापमानाची नोंद झाली होती. राज्यातील बहुतांशी भागात तापमान ३७ अंशाच्या पुढे सरकले आहे.

देशातील किमान तापमानातही वाढ झाली आहे. हरियानातील नहान येथे देशातील सर्वात कमी १३.१ अंश सेल्सिअस तापमानाची नोंद झाली होती. तर सर्वाधिक तापमान गुजरातमधील भूज येथे नोंदले गेले. भूज येथे ४२.४ अंश सेल्सिअस तापमान होते. राज्यातील निफड येथील गहू संशोधन केंद्रात १५.८ अंशाची नोंद झाली होती. राज्यातील तापमानातील वाढ कायम राहील. तसेच विदर्भातील अकोला आणि चंद्रपूर येथे पुढील २ दिवसांनंतर उष्णतेच्या लाटेचा इशारही हवामान विभागाने दिला.