weather report today : पावसाची दडी कायम असल्याने राज्यात उन्हाचा चटका वाढला आहे. ढगाळ हवामानामुळे चांगलाच घामटा निघत आहे. आज (ता. ३१) राज्यात तुरळक ठिकाणी विजांसह हलक्या पावसाची शक्यता हवामान विभागाने वर्तविली आहे. पावसात मोठा खंड पडल्याने अनेक भागांत पावसाची प्रतीक्षा आहे.

मॉन्सूनचा आस असलेला कमी दाबाचा पट्टा हिमालयाच्या पायथ्याकडे कायम आहे. ईशान्य बिहारपासून पूर्व मध्य बंगालच्या उपसागरापर्यंत हवेचा आणखी एक कमी दाबाचा पट्टा तयार झाला आहे. पूर्व मध्य बंगालच्या उपसागरात समुद्र सपाटीपासून ५.८ किलोमीटर उंचीवर चक्राकार वारे वाहत आहेत. मध्य प्रदेश परिसरावर, दक्षिण अंतर्गत कर्नाटक परिसरावर चक्राकार वाऱ्यांच्या स्थिती आहेत. तसेच कर्नाटकपासून कोमोरिन भागापर्यंत हवेचा कमी दाबाचा पट्टा कायम आहे.

राज्यात पावसाने उघडीप दिली असून, अनेक भागांत निरभ्र आकाशामुळे स्वच्छ सूर्यप्रकाश जमिनीवर येत असल्याने कमाल तापमानात वाढ झाली आहे. दुपारच्या वेळी घराबाहेर पडणे तापदायक ठरत आहे. ऐन पावसाळ्यात उन्हाच्या झळा वाढल्या असून, अंगाची काहिली होत आहे. राज्यात तुरळक ठिकाणी हलक्या ते मध्यम पावसाच्या सरी पडत आहेत. आज (ता. ३१) कोकण, मध्य महाराष्ट्र, मराठवाड्यात तुरळक ठिकाणी विजांसह पावसाची शक्यता हवामान विभागाने वर्तविली आहे.