Weather Update Pune : मॉन्सूनच्या पावसाने जोर धरल्याने राज्याच्या अनेक भागांत मध्यम ते जोरदार पाऊस कोसळला. धरणांच्या पाणलोटात झालेल्या पावसाने नद्यांना पूर आले. आज (ता. १०) कोकण आणि मध्य महाराष्ट्राच्या घाटमाथ्यावर जोरदार पावसाचा ‘येलो अलर्ट’ आहे. उर्वरित राज्यात हलक्या ते मध्यम पावसाची शक्यता हवामान विभागाने वर्तविली आहे.

मॉन्सूनचा आस असलेला कमी दाबाचा पट्टा सर्वसाधारण स्थितीच्या दक्षिणेकडे सक्रिय असून, जैसलमेर, अजमेर, गुणा, मंडला, पेंद्रा रोड, दिघा ते ईशान्य बंगालच्या उपसागरापर्यंत सक्रिय आहे.

मध्य प्रदेश आणि परिसरावर समुद्र सपाटीपासून ७.६ किलोमीटर उंचीवर चक्राकार वारे वाहत आहेत. त्यापासून दक्षिण मध्य महाराष्ट्रापर्यंत हवेचा कमी दाबाचा पट्टा तयार झाला आहे. अंदमान समुद्रात चक्राकार वारे वाहत असून, पूर्व-मध्य बंगालच्या उपसागरात मंगळवारपर्यंत (ता. १२) नव्याने चक्राकार वाऱ्यांची स्थिती तयार झाली आहे.

पावसासाठी पोषक हवामान असल्याने राज्यात पावसाचे पुनरागमन झाले. अनेक ठिकाणी मध्यम ते जोरदार पाऊस कोसळला. आज (ता. १०) कोकणातील ठाणे, रायगड, रत्नागिरी, सिंधुदुर्ग आणि मध्य महाराष्ट्रातील पुणे, सातारा जिल्ह्यांच्या घाटमाथ्यावर जोरदार पावसाचा ‘येलो अलर्ट’ देण्यात आला आहे.

तर उर्वरित राज्यात तुरळक ठिकाणी विजांसह हलक्या ते मध्यम पावसाचा अंदाज हवामान विभागाने वर्तविला आहे.

जोरदार पावसाचा इशारा (येलो अलर्ट) :

ठाणे, रायगड, रत्नागिरी, सिंधुदुर्ग, पुणे, सातारा.