Pune News : उत्तरेकडील थंड वारे महाराष्ट्राकडे आल्याने पारा घसरण्यास सुरुवात झाली आहे. उत्तर महाराष्ट्रात थंडी परतली असून, उर्वरित राज्याच्या किमान तापमानात आणखी घट होण्याची शक्यता आहे. आज (ता. १५) राज्यात थंडी वाढण्याचा अंदाज हवामान विभागाने वर्तविली आहे.

उत्तर भारतात थंडीचा कडाका वाढला असून, रविवारी (ता. १३) पंजाबच्या लुधियाना येथे देशाच्या सपाट भूभागावरील नीचांकी उणे २.५ अंश सेल्सिअस तापमान नोंदले गेले. पंजाब, हरियाना, चंडीगड, दिल्ली, उत्तर प्रदेशात अति दाट धुक्याचे साम्राज्य पाहायला मिळाले. तसेच उद्यापर्यंत (ता. १६) पंजाब, हरियाना, चंडीगड, दिल्ली राज्यात थंडीची तीव्र लाट कायम राहण्याची शक्यता आहे.

राज्यात किमान तापमानात घट होऊ लागली असून, धुळे येथील कृषी महाविद्यालयात राज्यातील नीचांकी ११.४ अंश सेल्सिअस तापमानाची नोंद झाली. कोकण वगळता उर्वरित राज्याच्या बहुतांश भागात किमान तापमान १२ ते १७ अंशांच्या दरम्यान आहे. राज्यात किमान तापमानात हळूहळू घट होत थंडी वाढण्याची शक्यता हवामान विभागाने वर्तविली आहे.

रविवारी (ता. १४) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे ३३.३ (१५.४), धुळे ३२.४ (११.४), जळगाव ३२.५ (१६.७), कोल्हापूर ३२.३ (१८.५), महाबळेश्‍वर २७.६ (१५.५), नाशिक ३२.३ (१५.४), निफाड ३१ (१२.२), सांगली ३२.९ (१७.२), सातारा ३२.२ (१५.८), सोलापूर ३४.१ (१८.६), सांताक्रूझ ३३.३ (२०.६), डहाणू २८.६ (१८.६), रत्नागिरी ३४.१ (२१.१),

छत्रपती संभाजीनगर ३१ (१६.४), नांदेड ३१.६ (१७.८), परभणी ३२.४ (१७), अकोला ३२.६ (१६.७), अमरावती ३०.६ (१६.४), बुलडाणा ३१ (१७), ब्रह्मपुरी ३२.८ (१७.३), चंद्रपूर ३१.६ (१६), गडचिरोली ३०.२ (१६.४), गोंदिया ३०.२ (१६), नागपूर ३१.१ (१६.२), वर्धा ३१.५ (१६.५), वाशीम ३२.२ (१४.६), यवतमाळ ३१.८ (१५.२).