राज्यात तापमान झपाट्याने वाढत असून दुपारी घराबाहेर पडणे मुश्किल झाले आहे. अनेक भागांत तापमान ४० अंशांच्या पुढे गेलं असून, विदर्भात उष्णतेच्या लाटेचा इशारा देण्यात आला आहे. अकोला, चंद्रपूर आणि यवतमाळ जिल्ह्यांत ऑरेंज अलर्ट जारी करण्यात आला आहे. तसेच अमरावती, नागपूर आणि वर्धा जिल्ह्यांसाठी येलो अलर्ट देण्यात आला आहे. उद्या यवतमाळ, वर्धा, नागपूर आणि चंद्रपूर जिल्ह्यांतही येलो अलर्टचा इशारा आहे. दक्षिण महाराष्ट्रात काही भागांत ढगाळ वातावरण आणि किरकोळ पावसाची शक्यता वर्तवली आहे. विदर्भातील अकोला, अमरावती, ब्रह्मपुरी, चंद्रपूर, नागपूर, वर्धा, यवतमाळ, मालेगाव आणि सोलापूर जिल्ह्यांत तापमान ४० अंशांच्या पार पोहोचले आहे. हवामान विभागाने राज्यात तापमानातील चढ-उतार सुरूच राहण्याचा अंदाज व्यक्त केला आहे.