IMD rain alert: आज राज्यातील कोकण, मध्य महाराष्ट्र, उत्तर महाराष्ट्र, मराठवाडा आणि विदर्भातील काही भागांमध्ये जोरदार पावसाची शक्यता हवामान विभागाने व्यक्त केली आहे. कोकणातील पालघर, रायगड, रत्नागिरी आणि सिंधुदुर्ग जिल्ह्यांमध्ये काही ठिकाणी जोरदार पावसाचा इशारा कायम आहे. पुढील चार दिवस कोकणात पावसाचा जोर राहण्याचा अंदाज आहे. मध्य महाराष्ट्रात पुणे, सातारा आणि कोल्हापूरच्या घाटमाथ्यावर मंगळवार ते शनिवार या काळात एक-दोन ठिकाणी मुसळधार ते अतिमुसळधार पावसाची शक्यता आहे. उत्तर महाराष्ट्रातील धुळे, नंदुरबार, जळगाव आणि नाशिक जिल्ह्यांत मंगळवारी आणि बुधवारी जोरदार सरी पडण्याची शक्यता हवामान विभागाने व्यक्त केली आहे.