तुळजापूर जि उस्मानाबाद : येथील कृषी विज्ञान केंद्र प्रक्षेत्रावर ग्रामीण युवक, शेतकरी आणि शेतकरी महिला यांच्यासाठी शेतीमध्ये ड्रोन तंत्रज्ञानाचा (Drone Technology In Agriculture) वापर या विषयावर कार्यशाळेचे आयोजन करण्यात आले होते.

उस्मानाबाद जिल्ह्यामध्ये सोयाबीन या पिकाचे क्षेत्र सर्वाधिक आहे. या पिकाच्या किडनियंञणासाठी दोन किंवा तीन कीटकनाशकांच्या फवारण्या शेतकरी करत असतात. परंतु सततच्या पावसामुळे कोणत्याही प्रकारची फवारणी करणे शक्य होत नाही. वेळेवर फवारणीसाठी मजूर देखील उपलब्ध होत नाहीत.

एका ठरावीक कालावधीनंतर पिकांची पूर्ण वाढ झाल्यामुळे शेतात फवारणीसाठी जाता येत नाही. त्यामुळे कीड पिकांचे नुकसान करते. हे नुकसान टाळण्यासाठी आधुनिक तंत्रज्ञानाचा वापर करून ड्रोनद्वारे पिकांवर फवारणी करता येते. उस्मानाबाद जिल्ह्यामध्ये विशाल मगर या युवा शेतकऱ्याने शासकीय योजनेचा कोणताही लाभ न घेता स्वत:चे ड्रोन विकत घेतले आहे.

स्वत:च्या बागायती शेतीमध्ये याचा वापर करण्याच्या उद्देशाने ड्रोन घेतले असते तरी यामुळे भाडेतत्वावरील पिकांवर फवारणीचा व्यवसाय श्री विशाल मगर यांना फायदेशीर ठरत आहे. या कार्यशाळेमध्ये कृषी सहायक योगेश स्वामी यांनी ड्रोन खरेदीसाठी शासनाच्या योजना यावर मार्गदर्शन केले.