Solapur News : पंढरपूर तालुक्यात कृषी विभागाच्या (Agriculture Department) विविध योजनांच्या माध्यमातून एक हजार ८९६ शेतकऱ्यांना सहा कोटी ४६ लाख १२ हजार ३०४ रुपयांचे अनुदान वितरित करण्यात आले असल्याची माहिती तालुका कृषी अधिकारी भागवत सरडे यांनी दिली.

सरडे म्हणाले, की शेतकऱ्यांना शेतीसाठी आवश्यक असलेल्या विविध बाबींच्या खरेदीसाठी तसेच शेतामध्ये विविध पायाभूत सुविधांच्या उभारणीसाठी आर्थिक मदत मिळावी, यासाठी केंद्र सरकार आणि राज्य सरकारच्या कृषी विभागामार्फत विविध योजना राबविण्यात येत आहेत.

शेतकऱ्यांना विविध योजनांचा लाभ घेण्यासाठी तसेच या योजना पारदर्शक व गतिमान पद्धतीने राबविण्यासाठी महाडीबीटी प्रणाली विकसित करण्यात आली आहे.

या योजनेच्या माध्यमातून शेतकऱ्यांना आधुनिक शेती तंत्र शिकण्यापासून ते अनुदानावर शेतीसाठी आवश्यक उपकरणे खरेदी करता येत आहेत.

कृषी विभागाच्या माध्यमातून प्रामुख्याने बियाणे, यंत्र व अवजारे, ठिबक तुषार संच इत्यादींची खरेदी तसेच शेततळे, खोदकाम, प्लॅस्टिक अस्तरीकरण, कांदा चाळ, शेडनेट गृह व हरितगृह उभारणी, फळबाग लागवड नियोजन, कृषी यांत्रिकीकरण आदी योजनांचा समावेश असल्याचे सरडे यांनी सांगितले.

पंढरपूर तालुक्यात कृषी विभागामार्फत २०२२-२३ या आर्थिक वर्षात कृषी यांत्रिकीकरण, ठिबक सिंचन, वैयक्तिक शेततळे, शेततळे अस्तरीकरण, कांदाचाळ अशा विविध योजनांतून एक हजार ८९६ शेतकऱ्यांना ६ कोटी ४६ लाख १२ हजार ३०४ रुपयांचे अनुदान वितरित करण्यात आले असून, शेतकऱ्यांनी शासनाच्या विविध योजनांचा लाभ घ्यावा, असे आवाहनही सरडे यांनी केले आहे.