Akola News : जिल्ह्यात ‘गाळमुक्त धरण गाळयुक्त शिवार’ योजनेला शेतकऱ्यांचा चांगला प्रतिसाद मिळत आहे. जिल्ह्यात आतापर्यंत एकूण ५८७ एकर क्षेत्रावर धरणांमधून काढण्यात आलेला गाळ पसरविण्यात आला आहे. त्यामुळे १८ कोटी ८० लाख लिटर्सने प्रकल्पांच्या पाणी साठवण क्षमतेतही वाढ झाली आहे.

‘‘या योजनेला मिळालेला प्रतिसाद व लांबलेला पाऊस पाहता शेतकऱ्यांना गाळ वाहून नेण्यासाठी पहिला मोठा पाऊस येईपर्यंत मुदत वाढवून देण्यात आली आहे’’, अशी माहिती जिल्हा जलसंधारण अधिकारी हरिभाऊ गिते यांनी दिली.

‘‘या आधी या योजनेअंतर्गत मुदत १५ जूनपर्यंत होती. ती आता वाढविण्यात आली आहे. शेतकऱ्यांनी या योजनेअंतर्गत गाळ वाहून न्यावा. आपली शेती अधिक सुपीक करून घ्यावी,’’ असे आवाहन जिल्हाधिकारी निमा अरोरा यांनी केले.

‘गाळमुक्त धरण गाळयुक्त शिवार’ ही जमिनीची सुपीकता वाढविणारी योजना आहे. त्यासाठी अशासकीय संस्थांतर्फे १६ ठिकाणी गाळ काढण्याचे काम करण्यात आले. त्यात जिल्ह्यातील ५२२ शेतकऱ्यांनी सहभाग घेऊन शेतात धरणातील गाळ पसरवून घेतला.

तब्बल ५८७ एकर क्षेत्रावर १ लाख ८८ हजार ४२ घनमीटर गाळ टाकण्यात आला. त्यामुळे जिल्ह्यात जलसाठवण क्षमतेत १८ कोटी ८० लाख लिटर्सने वाढ झाली आहे. हे अभियान राबविण्यासाठी विविध यंत्रणा सहभागी झालेल्या आहेत.