Nanded News : ‘‘जिल्ह्यात गायवर्ग पशुधनाला ‘लम्पी स्कीन’ अजाराचा प्रादुर्भाव वाढला आहे. इतर राज्यांतून येणाऱ्या‍ जनावरांमुळे जिल्ह्यात बाधित होणाऱ्या जनावरांची संख्या वाढली आहे. त्यामुळे जिल्हाधिकारी अभिजित राऊत यांनी पुढील आदेशापर्यंत जिल्ह्यातील सर्वच जनावरांच्या बाजारातील गायवर्ग जनावरांच्या खरेदी-विक्रीवर बंदी घातली आहे.

जिल्ह्यात मागील दोन महिन्यांपासून गायवर्ग पशुधनामध्ये ‘लम्पी स्कीन’चा प्रादुर्भाव आढळला आहे. यामुळे अनेक जनावरे मृत्युमुखी पडली आहेत. हा प्रादुर्भाव झपाट्याने वाढत असल्याने जिल्हा प्रशासनाने संपूर्ण जिल्हा ‘लम्पी’बाधित घोषित केला होता. परंतु तरीही प्रादुर्भाव कमी होईना.

जिल्ह्यातील १६ तालुक्यांतील १९७ ईसी केंद्रांमध्ये गोवर्गीय पशुधन मोठ्या प्रमाणात बाधित झाल्याचे आढळून आले आहे. याचा प्रसार जनावरांच्या खरेदी विक्री, वाहतुकीमुळे होण्याची शक्यता नाकारता येत नाही.

यामुळे जिल्हाधिकाऱ्यांनी प्राण्यांमधील संक्रमण व सांसर्गिक रोग प्रतिबंध व नियंत्रण अभिनियम २००९ नुसार जिल्ह्यात गोवर्गीय पशुधनाच्या खरेदी-विक्रीचे बाजार पुढील आदेशापर्यंत बंद ठेवण्याचे आदेश दिले आहेत. म्हैस वर्ग, शेळी व मेंढ्याचे खरेदी-विक्रीचे व्यवहार सुरू राहतील, असेही जिल्हाधिकाऱ्यांनी आदेशात म्हटले आहे.

‘पशुसंवर्धन’कडून प्रादुर्भावाची माहिती मिळेना

जिल्ह्यात ‘लम्पी’ची लागण गायवर्ग पशुधनाला झाल्याने हजारो जनावरे बाधित झाली आहेत. प्रादुर्भाव वाढू नये, तसेच बाधित जनावरांची पशुपालकांनी काय काळजी घ्यावी, याबाबत जिल्हा पशुसंवर्धन उपायुक्त कार्यालयाकडून दररोज माहितीचे प्रसिद्धिपत्रक मिळत होते.

यामुळे त्याची माहिती प्रसार माध्यमांमार्फत पशुपालकांना मिळत होती. परंतु मागील दोन महिन्यांपासून पशुसंवर्धन विभाग कोणत्याही प्रकारची माहिती देत नसल्याने शेतकऱ्यांना माहिती मिळत नसल्याची स्थिती आहे.