मुंबई  : राज्याचे मुख्य सचिव अजोय मेहता यांना तीन महिन्यांची मुदतवाढ मिळाली आहे. त्यामुळे मेहता हे सरकारच्या सेवेत जूनपर्यंत कार्यरत राहतील.

राज्यात उदभवलेल्या कोरोना विषाणच्या संकटाच्या पार्श्वभूमीवर मुख्यमंत्री उद्धव ठाकरे यांनी २३ मार्चला केंद्र सरकारला पत्र लिहून श्री. मेहता यांना तीन महिने मुदत वाढवून देण्याची विनंती केली होती. केंद्र सरकारने ही विनंती मान्य केली असून यासंदर्भातील पत्र सामान्य प्रशासन विभागाला पाठवले आहे.

अजोय मेहता हे नियत वयोमानानुसार सप्टेंबर २०१९ मध्ये सेवानिवृत्त झाले. मात्र, तत्कालीन राज्य सरकारने विधानसभा निवडणुकीच्या तोंडावर श्री. मेहता यांना सहा महिन्यांची मुदतवाढ मिळवून दिली. त्यानुसार श्री. मेहता यांचा कार्यकाळ येत्या ३१ मार्चला संपणार होता. सध्या कोरोना विषाणूचा प्रादूर्भाव रोखण्यासाठी राज्य सरकारकडून युध्द पातळीवर प्रयत्न सुरू आहेत. त्यामुळे श्री. मेहता यांना आणखी तीन महिन्यांची मुदतवाढ देण्याचा निर्णय सरकारला घ्यावा लागला आहे.

या निर्णयामुळे मुख्य सचिव पदाच्या शर्यतीत असलेले अतिरिक्त मुख्य सचिव संजयकुमार, प्रविणसिंह परदेशी आणि सीताराम कुंटे यांना आता जूनपर्यंत प्रतीक्षा करावी लागणार आहे.