मुंबई  : कोरोना विषाणूचा प्रादुर्भाव पूर्णपणे नियंत्रणात येईपर्यंत मंत्रालयीन प्रशासकीय विभाग तसेच इतर कार्यालयांनी बैठका आयोजित करू नयेत, असे आदेश सामान्य प्रशासन विभगाने गुरुवारी (ता. १९) जारी केले आहेत. त्यामुळे मंत्रालयातील सरकारी बैठकांवर निर्बंध आले आहेत.

कोरोना विषाणूचा संसर्ग रोखण्यासाठी मंत्रालयात सर्वसामान्य नागरिकांना प्रवेशबंदी करण्यात आली आहे. तसेच, मंत्रालयातील कर्मचाऱ्यांची उपस्थिती ५० टक्क्यांवर आणली आहे. आता मंत्रालयीन प्रशासकीय विभाग तसेच त्यांच्या अखत्यारीतील कार्यालयांनी शक्यतो बैठकांचे आयोजन करू नये. गरज असेल तरच महत्त्वाच्या बैठका आयोजित कराव्यात. तसेच, विषाणूचा संसर्ग टाळण्याच्या दृष्टिकोनातून बैठकीला उपस्थित राहणारे अधिकारी आणि कर्मचारी यांचा एकमेकांशी संपर्क होणार नाही अशाप्रकारे एक आसन सोडून पुरेसे अंतर ठेवण्याची दक्षता घ्यावी, अशी सूचना सामान्य प्रशासन विभागाने केली आहे.   राज्यस्तरीय नियंत्रण कक्ष दरम्यान, कोरोना विषाणूमुळे उद्भवणाऱ्या संसर्गजन्य आजारामुळे आरोग्यविषयक आपत्कालीन परिस्थिती हाताळण्यासाठी मंत्रालयात सहाव्या मजल्यावर ६०३ क्रमांकाच्या दालनात राज्यस्तरीय नियंत्रण कक्ष उघडण्यात आला आहे. या नियंत्रण कक्षाची जबाबदारी अतिरिक्त मुख्य आयुक्त राजीव जलोटा, प्रधान सचिव भूषण गगराणी यांच्यावर सोपविण्यात आली आहे.