औरंगाबाद : अखिल भारतीय किसान सभेच्या वतीने इनाम जमिनी, वक्फ बोर्डाच्या जमिनी व गायरान जमिनी कसणाऱ्यांच्या नावे करा या मागणीसाठी औरंगाबाद येथील विभागीय आयुक्त कार्यालयासमोर शुक्रवारी (ता.१३) राज्यव्यापी दिवाबत्ती आंदोलन करण्यात आले.

या वेळी किसान सभेचे केंद्रीय अध्यक्ष डॉ. अशोक ढवळे, माजी आमदार जे.पी.गावीत, अध्यक्ष किसन गुजर, सरचिटणीस डॉ. अजित नवले, कोषाध्यक्ष उमेश देशमुख, राज्य कौन्सिल सदस्य भगवान भोजने यांनी आंदोलनाचे नेतृत्व केले. 

आंदोलनादरम्यान किसान सभेच्या शिष्टमंडळाने वक्फ बोर्डाच्या कार्यालयाकडे निवेदन सादर केले. डॉ. नवले म्हणाले, की ‘‘वक्फ बोर्डाचे सीईओ व महसूलमंत्री बाळासाहेब थोरात यांच्याशीही भ्रमणध्वनीवरून संवाद साधला गेला. वक्फ बोर्ड लवकरच आंदोलकांच्या मागण्यांच्या अनुषंगाने बैठक बोलावणार असून इनामी जमिनी संदर्भात महसूल मंत्र्यांनीही वेळ देण्याचे व सकारात्मक निर्णय घेण्याचे आश्वासन दिले आहे. या आंदोलनाची शासन व प्रशासनाने दखल न घेतल्यास येत्या काळात तीव्र आंदोलन केले जाईल, असेही आंदोलना वेळी किसान सभेकडून स्पष्ट करण्यात आले.’’