नगर ः शासकीय हमीभाव केंद्रांवर तूर विक्री केलेल्या राज्यातील शेतकऱ्यांचे पावणेदोनशे कोटींपेक्षा अधिक रुपये अडकले आहेत. नाफेड व भारतीय अन्न महामंडळामार्फत आतापर्यंत सात लाख ५३ हजार क्विंटल तूर खरेदी झाली आहे. खरिपाच्या तोंडावर तातडीने पैसे मिळाले नाही तर शेतकऱ्यांना अडचणीला सामोरे जावे लागणार आहे. शेतकऱ्यांकडील तूर, हरभऱ्याची खरेदी करण्यासाठी शासनाने नाफेडमार्फत हमीभावाने खरेदी केंद्रे सुरु केली आहेत. सध्या भारतीय अन्न महामंडळामार्फत सोलापूर, चंद्रपूर, उस्मानाबाद, वर्धा, बीड या पाच जिल्ह्यांतील ४१ केंद्रांवर तूर खरेदी सुरु आहे. तसेच राज्यात मार्केटिंग फेडरेशनमार्फत नाफेड तर्फे १५७ केंद्रांवर तुरीची ५ हजार ८०० रुपये क्विंटल या हमीभावाने खरेदी सुरु आहे. खरेदीनंतर साधारण आठ ते पंधरा दिवसांत पैसे मिळणे गरजेचे असताना वेळेवर पैसै मिळत नसल्याच्या शेतकऱ्यांच्या तक्रारी आहेत.

आतापर्यंत केंद्रांवर खरेदी केलेल्या सात लाख ५३ हजार क्विंटल तुरीपैकी चाळीस टक्के म्हणजे तीन लाख क्विंटल तुरीचे पैसे येणे बाकी आहे. आतापर्यंत २५० कोटी वितरित केले असून अजून साधारण १७५ कोटींचे वितरण रखडले आहे. नगर जिल्ह्याचा विचार करता आतापर्यंत ११ हजार ४०४ शेतकऱ्यांकडून ७० हजार ६०५ क्विंटल तूर खरेदी झालेली आहे. त्यापैकी ४९ हजार ९७२ क्विंटल तुरीचे २८ कोटी ९८ लाख ३७ हजार ६०० रुपये वितरित केले असले तरी अजून १२ कोटी रुपये रखडले आहेत.

खरीप हंगाम वीस दिवसांवर आला आहे. त्याआधी खते, बियाणे व अन्य बाबींची खरेदी केली जाते. शेती मशागतीची कामे याच पैशांवर होतात. त्यामुळे तूर विक्रीचे पैसे वेळेवर मिळाले नाहीत तर खरिपावर परिणाम होण्याची शक्यता व्यक्त केली जात आहे. दरम्यान, तुरीचे राहिलेले पैसै तातडीने शेतकऱ्यांना देण्याबाबत नाफेडकडून प्रक्रिया सुरु आहे. चार दिवसांत बहुतांश शेतकऱ्यांना पैसे वितरित होतील असे मार्केटींग फेडरेशनच्या अधिकाऱ्यांनी सांगितले.