नगर  ः ‘कोरोना’च्या पार्श्वभूमीवर पशुसंवर्धन विभागातील कर्मचारी अत्यावश्यक सेवा देत आहेत. सगळीकडे लॉकडाउन असताना ग्रामीण व शहरी भागात पशुसंवर्धन विभागातील अधिकारी व कर्मचारी स्वतःचा जीव धोक्यात घालून पाळीव जनावरांवर उपचार करीत आहेत. परंतु सुविधा व विमा संरक्षणापासून ते वंचित आहेत तरी याबाबी लागू कराव्यात, अशी मागणी नगर जिल्‍ह्याचे पालकमंत्री हसन मुश्रीफ यांच्याकडे निवेदनाद्वारे पशुचिकित्सा व्यवसायी संघटनेने केली आहे.

संघटनेने दिलेल्या निवेदनात म्हटले आहे, की पशुधन विकास अधिकारी, सहायक पशुधन विकास अधिकारी, पशुधन पर्यवेक्षक हे आजारी पशुधनाचा जीव वाचविण्यासाठी पशुपालकांच्या दारात जाऊन सेवा उपलब्ध करून देत आहेत. तसेच पशुपालकांना स्वतःची व पशुची काळजी घेण्यासाठी मार्गदर्शन करीत आहे. हे सर्व करत असताना पशुसंवर्धन विभागातील कर्मचारी अनेक व्यक्तींच्या संपर्कात येत आहेत ही बाब निवेदनात निदर्शनास आणून दिली असून या कर्मचाऱ्यांना पुढील ९० दिवसासांठी किमान एक कोटींचे विमा संरक्षण देण्यात यावे, अशी मागणी संघटनेच्या पदाधिकाऱ्यांनी केली आहे. पशुंवरील उपचाराचे सेवाशुल्क नको लॉकडाउन असल्याने शेतमाल मातीमोल भावाने विकला जात असून दुधाचे दर कमी झालेले आहे. अशा परिस्थितीत पशुपालकांना पशुंवरील उपचाराचे सेवाशुल्क व कृत्रिम रेतनाचे सेवाशुल्क देणे अवघड झालेले आहे. पशुपालकांकडुन कोणतेच सेवाशुल्क आकारण्यात येऊ नये,अशीही मागणी निवेदनात करण्यात आलेली आहे.