बुलडाणा  ः मका उत्पादक शेतकऱ्यांना दिलासा देण्यासाठी केंद्र सरकारने मका खरेदी करण्यास परवानगी दिली आहे. त्यानुसार राज्यात २५ हजार मेट्रीक टन मका खरेदी करता येणार आहे. सदर मका खरेदी केंद्र जिल्ह्यात तत्काळ सुरू व्हावे, यासाठी जिल्ह्याचे पालकमंत्री डॉ. राजेंद्र शिंगणे हे प्रयत्न करीत होते. त्यांच्या या प्रयत्नांना यश आले असून बुलडाणा जिल्ह्यात लवकरच शासकीय मका खरेदी केंद्र सुरू होणार आहे.

बुलडाणा जिल्ह्यात गतवर्षी चांगला पाऊस झाल्याने जिल्ह्यातील शेतकऱ्यांनी मोठ्या प्रमाणावर मक्याची लागवड केली होती. मक्याचे क्षेत्र १० हजार हेक्टरपेक्षा अधिक होते. उत्पादनही चांगले आले आहे. परंतु ‘कोरोना’मुळे बाजारात मक्याला एक हजार रुपये क्विंटलपर्यंत भाव मिळत असल्याने मका उत्पादक अडचणीत सापडले होते. त्यामुळे शासनाने शासकीय आधारभूत किमतीनुसार मका खरेदी करावी, अशी मागणी सातत्याने शेतकऱ्यांकडून होत होती.

याचीच दखल घेत केंद्र शासनाच्या ग्राहक कल्याण, अन्न व सार्वजनिक वितरण विभागामार्फत राज्यात या खरेदीला परवानगी देण्यात आली आहे. सदर खरेदी केंद्र जिल्ह्यात तत्काळ सुरू करावे यासाठी पालकमंत्री डॉ. शिंगणे यांनी अन्न व नागरी पुरवठा मंत्री छगन भुजबळ, विभागाचे प्रधान सचिव संजय खंदारे तसेच महामंडळाचे व्यवस्थापकीय संचालक श्री. म्हसे यांच्याशी चर्चा केली. त्यांनी शासकीय मका खरेदी केंद्र सुरू करण्यास संबधित यंत्रणेला आदेश दिले असून जिल्ह्यात लवकरच शासकीय मका खरेदी केंद्र सुरू होणार आहे.