पुणे  : उत्तरेकडील थंड वाऱ्याचा अभाव, ढगाळ हवामानामुळे राज्यात थंडीचा कडाका कमी झाला आहे. दुपारच्या वेळी उन्हाचा चटका आणि उकाडाही काहीसा वाढला आहे. शुक्रवारी (ता. १४) निफाड यथील गहू संशोधन केंद्रामध्ये राज्यातील नीचांकी ११.६ अंश सेल्सिअस तापमानाची नोंद झाली. राज्याच्या तापमानात चढ उतार शक्य असल्याचे हवामान विभागातर्फे सांगण्यात आले.

उत्तरेकडून येणाऱ्या थंड व कोरड्या वाऱ्यांना अडथळा निर्माण झाला आहे. त्यामुळे किमान तापमानात चांगलीच वाढ झाली आहे. समुद्रावरून महाराष्ट्रात येणाऱ्या उष्ण व दमट वाऱ्यामुळे हवामान ढगाळ होत आहे. राज्याच्या सर्वच भागात किमान तापमानात सरासरीपेक्षा २ ते ५ अंशांपर्यंत वाढ झाली आहे. राज्याच्या उत्तर भागात किमान तापमानात घट होण्याची शक्यता आहे. तर उर्वरित भागात चढ उतार होण्याची शक्यता हवामान विभागाने वर्तविली आहे.

शुक्रवारी (ता. १४) सकाळी राज्यातील विविध ठिकाणचे किमान तापमान, कंसात सरासरीच्या तुलनेत वाढ, घट (अंश सेल्सिअसमध्ये) : पुणे १५.० (३), नगर १५.५ (३), धुळे १२.०, जळगाव १३.२ (०), कोल्हापूर १९.५ (३), महाबळेश्‍वर १५.९ (२), मालेगाव १६.२ (५), नाशिक १५.५ (४), निफाड ११.६, सांगली १८.६ (३), सातारा १७.१ (३), सोलापूर १७.७ (०), अलिबाग २०.६ (३), डहाणू २३.४ (६), सांताक्रूझ २१.६ (४), रत्नागिरी २१.४ (२), औरंगाबाद १६.९ (३), परभणी १५.८ (०), नांदेड १४.० (-१), उस्मानाबाद १३.८ (-२), अकोला १५.० (-१), अमरावती १५.० (-२), बुलडाणा १६.४ (०), चंद्रपूर १४.८ (-२), गोंदिया १३.६(-२), नागपूर १२.९(-३), वर्धा १५.४ (१), यवतमाळ १५.०(-२).