नगर ः राहुरी येथील महात्मा फुले कृषी विद्यापीठाच्या कास्ट-कासम प्रकल्पाअंतर्गत सेंद्रिय शेती, निविष्ठा वापर, उत्पादन, प्रमाणीकरण व विपणन व्यवस्थापन या विषयावर शेतकऱ्यांसाठी सोमवार (ता.११) ते शुक्रवार (ता.१५) या पाच दिवसांच्या कालावधीत ऑनलाइन प्रशिक्षणाचे आयोजन केले आहे.

नैसर्गिक स्त्रोतांचे जतन, जमिनीची सुपीकता,पर्यावरण व जैवविविधतेचे रक्षण, बदलत्या हवामानात स्थानिक परिस्थितीशी जुळवून घेऊन रसायन अवशेषमुक्त अन्नधान्य व फळांचे शाश्वत उत्पादन घेण्याकरिता सेंद्रिय शेती पद्धती एक सक्षम पर्याय म्हणून बघितले जाते. याच अनुषंगाने शाश्वत पर्यावरणाचा समतोल राखून शाश्वत उत्पादनासाठी सेंद्रिय शेती, निविष्ठा वापर, उत्पादन, प्रमाणीकरण व विपणन व्यवस्थापन या विषयावर शेतकऱ्यांना मार्गदर्शन केले जाणार आहे.

आठवडाभराच्या मार्गदर्शनात शिक्षण व संशोधन संचालक डाॅ. हरिहर कौसडीकर, रोमीफ इंडियाचे राष्ट्रीय अध्यक्ष डाॅ. प्रशांत नाईकवाडी, सचिन पालकर, विवेक रोहोकले, संतोष चव्हाण, तुषार उगले, विश्वासराव पाटील, संजय राऊत, स्वप्नील खर्डे, स्वाती शिंगाडे मार्गदर्शन करणार आहेत. १५० शेतकऱ्यांना यात सहभागी होता येणार आहे, असे डाॅ. सुनील गोरंटीवार, संयोजक डॉ. उल्हास सुर्वे यांनी दिली. प्रशिक्षणाचे समन्वयक म्हणून डॉ. शुभांगी घाडगे, डॉ. सेवक ढेंगे, मोहसीन तांबोळी, हेमंत जगताप हे काम बघणार आहेत.