बुध, जि.सातारा  : खटाव तालुक्‍याच्या उत्तरेकडील पट्ट्यात कांदा काढणीच्या कामांना वेग आला असून, रखरखत्या उन्हात मजूर व शेतकरी चार महिने अहोरात्र कष्ट करून तयार केलेल्या कांद्याच्या काढणीसाठी उन्हाच्या झळा सोसताना दिसत आहेत.  यावर्षी प्रतिकूल हवामानामुळे कांद्याच्या उत्पादनात सरासरी ३० टक्के घट झाल्याचे शेतकरी सांगत आहेत. 

ग्रामीण भागात ३५ ते ४० अंश दरम्यान तापमान आहे. उन्हाच्या झळांनी अंगाची लाही-लाही होत असतानाही उत्तर खटाव परिसरातील शेतकरी मजूर व कुटुंबातील सदस्यांच्या मदतीने कांदा काढणीत गुंतले आहेत. असह्य उकाड्यातही डिस्कळ, गारवडी, ललगुण, नागनाथवाडी, फडतरवाडी, बुध, काटेवाडी परिसरातील शेतकरी कांदा काढणीत व्यस्त आहेत. यावर्षी पाऊस चांगला झाल्याने बोअरवेल व विहिरींना बऱ्यापैकी पाणी असल्यामुळे परिसरात चालू वर्षी कांदा लागवड क्षेत्रात वाढ झाली आहे.

मात्र, सततच्या ढगाळ वातावरणामुळे व पहाटे पडणाऱ्या दाट धुक्‍यामुळे कांदा पिकावर रोगांचा प्रादुर्भाव झाल्याने दरवर्षीच्या तुलनेत सरासरी उत्पादनात ३० ते ४० टक्के घट जाणवत असल्याचे सांगण्यात येत आहे.

एकीकडे तापमान वाढीमुळे व ‘कोरोना’च्या भीतीपोटी नागरिकांना घराबाहेर पडू नये, असे सांगितले जात असताना शेतकरी व मजूर वर्ग मात्र चार पैसे मिळावेत, यासाठी उन्हाच्या झळा सोसत कांदा काढणी करताना दिसत आहे. सध्या ‘कोरोना’मुळे बाजारपेठांवर मर्यादा आल्यामुळे बाजारभाव कमी असल्याने शेतकरी कांदा चाळींमध्ये साठवण्यावर भर देत आहेत.