सातारा  : जिल्ह्यातील खरीप हंगामाची तयारी पूर्ण झाली असून, खरिपासाठी लागणाऱ्या बियाणे व खतांचा मुबलक साठा उपलब्ध आहे. काही ठिकाणी कृषी विभागाकडून शेतकऱ्यांना बांधावर खते व बियाणे दिली जात आहेत, अशी माहिती पालकमंत्री बाळासाहेब पाटील यांनी मुख्यमंत्री उध्दव ठाकरे व उपमुख्यमंत्री अजित पवार यांना व्हिडीओ कॉन्फरन्सद्वारे आयोजिलेल्या बैठकीत दिली.

राज्यस्तरीय खरीप हंगाम २०२० आढावा बैठक नुकतीच झाली. यामध्ये जिल्ह्यातील खरीप हंगाम २०२० चे नियोजन आणि संभाव्य अडचणी जाणून त्यावर मार्ग काढण्याच्या सूचनाही प्रशासनाला दिल्या. बैठकीस गृह राज्यमंत्री (ग्रामीण) शंभूराज देसाई, जिल्हा परिषद अध्यक्ष उदय कबुले, जिल्हाधिकारी शेखर सिंह, मुख्य कार्यकारी अधिकारी संजय भागवत, जिल्हा परिषदेचे कृषी सभापती मंगेश धुमाळ, जिल्हा उपनिबंधक प्रकाश अष्टेकर, प्रभारी जिल्हा अधीक्षक कृषी अधिकारी विजयकुमार राऊत, जिल्हा अग्रणी बॅंक व्यवस्थापक महादेव शिरोळकर उपस्थित होते.

मुख्यमंत्री ठाकरे म्हणाले, की सरकारला सहा महिने पूर्ण होत असून, चांगला अर्थसंकल्प मांडण्यात आला; पण आज ‘कोरोना’च्या संकटामुळे देशाची अर्थव्यवस्था धोक्‍यात आली आहे. अन्न धान्याच्या दृष्टीने बाजारपेठेचा अंदाज घेऊन राज्यात पुढील काळात काय करू शकतो, ते पाहण्याची गरज आहे. कोरोनानंतर जग बदलणार आहे, त्यात कृषी क्षेत्राची महत्त्वाची भूमिका राहणार आहे. शेतकऱ्यांनी घेतलेल्या दर्जेदार पिकांची बाहेरच्या देशात निर्यात कशी होईल, यासाठी संबंधित विभागांनी प्रयत्न करावेत.

कृषी अधीक्षक राऊत म्हणाले, जिल्ह्यातील खरीप हंगामाचे नियोजन पूर्ण झाले असून, खरिपासाठी एक लाख दोन हजार ९२३ टन खत पुरवठा मंजूर आहे. त्यापैकी मेअखेर ३० हजार ३०० टन इतका पुरवठा झाला आहे. मागील शिल्लक मिळून एकूण ६५ हजार २५० टन खत उपलब्ध आहे.