पुणे  : मॉन्सून सक्रिय होण्यास पोषक हवामान झाल्याने राज्यात पावसाला सुरुवात होणार आहे. आज (ता. ३०) कोकण, मध्य महाराष्ट्र, मराठवाड्यात तुरळक ठिकाणी जोरदार पावसाचा अंदाज आहे. मध्य महाराष्ट्र, मराठवाड्यात विजांसह पाऊस पडणार असून, विदर्भातही हलक्या ते मध्यम सरींची शक्यता हवामान विभागाने वर्तविली आहे. बुधवारी (ता.२९) दुपारनंतर कोकण, मध्य महाराष्ट्रात पावसाला सुरुवात झाली होती.    

मॉन्सूनचा आस असलेला कमी दाबाचा पट्टा दक्षिणेकडे सरकून सर्वसामान्य स्थितीत आला आहे. बंगालच्या उपसागरात आंध्र प्रदेश, तामिळनाडूच्या किनाऱ्यालगत चक्राकार वारे वाहत आहेत. त्यापासून विदर्भापर्यंत हवेचा कमी दाबाचा पट्टा सक्रिय असल्याने राज्यात पाऊस सुरू होण्यास पोषक हवामान होत आहे. बुधवारी सकाळपर्यंतच्या २४ तासांमध्ये विदर्भात अनेक ठिकाणी हलक्या ते मध्यम पावसाने हजेरी लावली. दुपारनंतर कोकण, मध्य महाराष्ट्र, मराठवाड्यात ढगांची दाटी होऊ लागली होती. 

आज (ता. ३०) कोकणातील रायगड, रत्नागिरी, सिंधुदुर्ग, मध्य महाराष्ट्रातील सातारा, सांगली, सोलापूर, नंदूरबार, धुळे, जळगाव, मराठवाड्यातील औरंगाबाद, बीड, उस्मानाबाद जिल्ह्यात जोरदार पावसाची शक्यता आहे. राज्याच्या उर्वरित भागातही ढगाळ हवामानासह हलक्या ते मध्यम सरी पडण्याचा अंदाज हवामान विभागाने वर्तविला आहे. 

बुधवारी (ता. २९ ) सकाळपर्यंतच्या २४ तासांत राज्यात विविध ठिकाणी पडलेला पाऊस, मिलिमीटरमध्ये (स्त्रोत - हवामान विभाग) : कोकण : कुलाबा ८९, वसई ७४, विक्रमगड ५१, अलिबाग ९३, खालापूर ३६, मुरूड ५३, मालवण ४५, अंबरनाथ ७०, भिवंडी ६५, उल्हासनगर ५१. मध्य महाराष्ट्र : पाथर्डी ४५, ओझरखेडा ३१, बार्शी ४२,  मराठवाडा : वसमत ३७, चाकूर ६१, शिरूर अनंतपाळ ५३, पूर्णा ३५.  विदर्भ : धामणगाव रेल्वे ३०, नांदगाव काझी ४७, भद्रावती ५२, ब्रह्मपुरी ४७, गोंडपिंपरी ४१, जेवती ३४, कोर्पणा ४१, मूल ४३, पोंभुर्णा ८५, वरोरा ६१, चामोर्शी ३०, एटापल्ली ३४, हिंगणा ३०, देवळी ३४, समुद्रपूर ३७, सेलू ४९, वर्धा ५०, करंजालाड ३५, मंगरूळपीर ३०, मानोरा ६४, अर्णी ४१, बाभुळगाव ५८, दारव्हा ४०, यवतमाळ ३२.